საპარლამენტო უმრავლესობის ლიდერი ზვიად კვაჭანტირაძე მიიჩნევს, რომ საქართველოს პრეზიდენტი „საარჩევნო კოდექსს“ ვეტოს არ დაადებს. მისი თქმით, არ ჰგონია, რომ გიორგი მარგველაშვილმა ვეტოს დადების თვალსაზრისით, ხელი შეუწყოს გარკვეულწილად დესტაბილიზაციას.
„გულწრფელად გეტყვით, რომ პრეზიდენტის მხრიდან ვეტოს დადებას არ ველოდები, რადგან არჩევნების მყარი და სტაბილური გარემოს შექმნის თვალსაზრისით, პრეზიდენტი პარლამენტთან ურთიერთობაში კონსტრუქციული იყო. იმის საშიშროებას ვერ ვხედავ, რომ მოკლე დროში საარჩევნო საკითხების რეგულირების თემებს უნდა დავუბრუნდეთ. არ მჯერა, რომ რაიმე ისეთი სერიოზული არგუმენტი გაჩნდეს, რომელიც განხილვის საწყის ეტაპზე დაგვაბრუნებს“, - განაცხადა კვაჭანტირაძემ.
ინტერპატიული ჯგუფი უფასო სარეკლამო დროსთან დაკავშირებით მიღებულ კანონზე პრეზიდენტს ვეტოს დადებისკენ მოუწოდებს. პარლამენტის მიერ მიღებული კანონპროექტის თანახმად, იმ პარტიათა რაოდენობა იზრდება, რომელთაც საარჩევნოდ უფასო საეთერო დროის გამოყენების შესაძლებლობა ექნებათ და ეს დრო ყველა ე.წ. კვალიფიციურ სუბიექტზე გადანაწილდება. ამასთანავე, პროექტით არ იზრდება მაუწყებლის მიერ გამოსაყოფი უფასო სარეკლამო დროის ხანგრძლივობა.