პარლამენტის ვიცე-სპიკერი მანანა კოახიძე მიიჩნევს, რომ ვანო მერაბიშვილის საქმეზე, ვინმეს დასჯაზე საუბარი რთული და ნაადრევია. კობახიძემ სტრასბურგში, ქართველი ჟურნალისტებთან ასევე განაცხადა, რომ მნიშვნელოვანია, ხელისუფლებამ მყისიერად მოახდინა რეაგირება და ვანო მერაბიშვილის საქმეზე დაიწყო გამოძიება.
„ევროსასამართლოს გადაწყვეტილების აღსრულება ჩვენი ვალდებულებაა. სადამდე მივა გამოძიება, უნდა დაველოდოთ. ჯერ ვინმეს დასჯაზე საუბარი რთული და ნაადრევია. უნდა გაირკვეს, რა ფაქტთან გვქონდა საქმე და რა თქმა უნდა შედეგები დაიდება. ესეც აბსოლუტურად ადეკვატური რეაგირებაა ქვეყნის მხრიდან”, - განაცხადა მანანა კობახიძემ.
ვანო მერაბიშვილის საკნიდან შესაძლო გაყვანასთან საქართველოს მთავრმა პროკურატურამ გამოძიება დაიწყო. ყოფილი პრემიერ-მინისტრი აცხადებდა, რომ საკნიდან მაშინდელი მთავარი პროკურორის, ოთარ ფარცხალაძის დავალებით გაიყვანეს, გაყვანის მიზეზი კი, გახმაურებულ საქმეებზე, მათ შორის ზურაბ ჟვანიას გარდაცვალებისა და საქართველოს ექსპრეზიდენტის ფინანსური საქმიანობის საქმეებზე ჩვენებების მიცემას აიძულებდნენ. ეს ეპიზოდი ვანო მერაბიშვილთან დაკავშირებით სტრასბურგის სასამართლოს 14 ივნისის გადაწყვეტილებაშიც მოხვდა.
