„ერთიანი ნაციონალური მოძრაობის“ წევრებმა დიპლომატიური კორპუსის წარმომადგენლებს ის დოკუმენტური მტკიცებულებები წარუდგინეს, რომლებიც „მიუთითებენ ვიცე-პრემიერის კახა კალაძის შესაძლო მონაწილეობაზე კორცხელის ინციდენტის ორგანიზებაში“. ამის შესახებ შეხვედრის დასრულების შემდეგ ენმ-ს წევრმა ოთარ კახიძემ განაცხადა. მისივე თქმით, დიპლომატიურ კორპუსს ასევე გააცნეს ადამიანის უფლებათა ევროპული სასამართლოს მიერ ვანო მერაბიშვილის საქმესთან დაკავშირებით მიღებული გადაწყვეტილება, ასევე საუბარი შეეხო საარჩევნო კამპანიის ფარგლებში არსებულ დარღვევებს და ტელეკომპანია „რუსთავი 2“-ის საქმეს.

პარტიის წევრმა სალომე სამადაშვილმა კი განაცხადა, რომ საქართველოს აქვს აღებული ვალდებულება საერთაშორისო თანამეგობრობის წინაშე, რომ ის თავისუფალ და დემოკრატიულ არჩევნებს ჩაატარებს.
,,კორცხელის ინციდენტი და დამატებითი დოკუმენტაცია, რაც დღეს გახდა ცნობილი, არის მხოლოდ ერთი დეტალი, რომელიც ქმნის საერთო კონტექსტს, თუ სად მიდის ქვეყანა. საერთაშორისო თანამეგობრობა საქმის კურსში უნდა იყოს იმასთან დაკავშირებით, რომ რეალურად ხელისუფლება არ აპირებს თავისუფალი და დემოკრატიული არჩევნებისთვის შესაძლებლობის მიცემას და იმ ვალდებულებების შესრულებას, რომელიც მან საკუთარ თავზე აიღო“, - განაცხადა სალომე სამადაშვილმა.