“ლიბერალ დემოკრატები” საარჩევნო კამპანიაში ერთვებიან და მოსახლეობასთან შეხვედრებს იწყებენ.
”წინ მძიმე გზაა ბრძოლის, შრომის და ღირსეული გამარჯვების!”, - აცხადებს პარტიის თავმჯდომარე მუხრან ბურჭულაძე.
მისი თქმით, საქართველო განცხადებებით ვერ გამთლიანდება, ოკუპანტის ტყვეობაში მყოფ ქართველებს უნდა მეცეთ მომავალი - ხარისხიანი განათლება და კარიერა.
”არავის გკადრებთ უფასო ლუკმას, გპირდებით შრომას და ღირსეულ შემოსავალს. ჩემთვის პრიორიტეტული არა ბიუჯეტის შესრულება არამედ მოქალაქეების კეთილდღეობაა. თაღლითების ოცნება ვალებით მოსუქებული ბიუჯეტია, საიდანაც ადვილად იჩხრიალებენ ფულს ჯიბეში, მე კი გეტყვით, რომ სახელმწიფო დოვლათს დასაქმებული ადამიანები ქმნიან. არცერთი დაუსაქმებელი მოქალაქე, მხოლოდ ასეთი მესახება საქართველო. თქვენ არავინ გპირდებათ შრომას, რადგან მშრომელი კაცი დამოუკიდებელია, არც არავინ იმეტებს თქვენთვის თავისუფლებას, რადგან რეჟიმი თქვენს მორჩილებაზე დგას. გპირდებით თავისუფლებას და შესაძლებლობების გამოვლენის საშუალებას. მახსოვს თითოეული ჩემი თანამშრომელი თუნდაც საჯარო რეესტრში, მათი დამსახურებით სააგენტო წლების მანძილზე მსოფლიოში პირველ ადგილზე იდგა. განათლებული და ენერგიული ადამიანებით გატენილია დღესაც მთელი სისტემა, მაგრამ მათ სჭირდებთ პროგრესული ხელმძღვანელები და თავისუფალი გარემო. საჯარო მოხელემ უნდა დაინახოს საკუთარი როლი ქვეყნის საქმეში, მან უნდა დაინახოს შრომის შედეგი და იამაყოს წარმატებით. უნდა დავასაქმოთ სტუდენტი ახალგაზრდები, რომ ჰქონდეთ ღირსეული ანაზღაურება, მიიღონ განათლება, მოიწყონ ცხოვრება ისე როგორც სურთ და შევუმსუბუქოთ მათ მშობლებს ტვირთი. მსუბუქი დანაშაულისთვის ადამიანი არ უნდა გავწიროთ, ის უნდა ვაიძულოთ მოიხადოს მოქალაქეობრივი ვალი და პასუხი კანონის წინაშე საკუთარი შრომით აგოს. ჩვენ უნდა გადავიდეთ ფინანსურ სანქციებზე და მსუბუქი დანაშაული უნდა დაისაჯოს ჯარიმით და შრომით, დაე კანონდამრღვევმა თავად შეინახოს ოჯახი თუ სახელმწიფო და არა პირიქით. ასეთია ევროპა და ასეთი იქნება მომავალი საქართველოც”, - ნათქვამია ლიბერალ დემოკრატების” თავმჯდომარის მუხრან ბუეჭულაძის განცხადებაში, რომელიც მან საარჩევნო კამპანიის დაწყების წინ გაავრცელა.
