"ჩემთვის პირადად არანაირი გამყოფი ხაზი არ არსებობს" - ეს განცხადება, ვიცე პრემიერმა კახი კალაძემ გააკეთა. კალაძემ რუსეთის საოკუპაციო რეჟიმის მიერ საქართველოს ოკუპირებულ რეგიონებსა და მოსაზღვრე სოფლებში არსებულ ვითარებაზე ისაუბრა.
ენერგეტიკის მინისტრი ამბობს, რომ საქართველოს ხელისუფლებამ საერთაშორისო საზოგადოებასთან ერთად, ყველაფერი უნდა გააკეთოს იმისთვის, რომ რუსულ ოკუპაციას ხელი შეუშალოს.
„ჩვენ ყველამ კარგად ვიცით, რომ საქართველოში ტერიტორიების 20% არის ოკუპირებული და ეს არის სამწუხაროდ, რუსეთის მიერ ოკუპირებული ტერიტორიები. ჩვენ ყველაფერი უნდა გავაკეთოთ საერთაშორისო თანამეგობრობასთან, საერთაშორისო ორგანიზაციებთან ერთად, რომ ამ ყველაფერს ხელი შევუშალოთ. ამასთან დაკავშირებით უამრავი განცხადებები იქნა გაკეთებული, უამრავი განცხადება კეთდება და უამრავი განცხადებები გაკეთდება, სამომავლოდ, რადგან ჩვენ არ შევეგუებით იმას, რომ დღეს ჩვენი ტერიტორიები არის ოკუპირებული,“-განაცხადა კახი კალაძემ.
