GRETA-მ (ტრეფიკინგის საკითხებში ევროსაბჭოს ექსპერტთა ჯგუფი) საქართველოს შესახებ მეორე ანგარიში გამოაქვეყნა.
ექსპერტთა ჯგუფის შეფასებით, საქართველომ 2012 წლის შემდეგ ადამიანების ტრეფიკინგის წინააღმდეგ ბრძოლის, მონაცემების შეგროვებისა და დაზარალებულთა დახმარების გასაუმჯობესებლად სამართლებრივი ზომების განვითარების კუთხით პროგრესს მიაღწია. თუმცა ტრეფიკინგის საკითხებზე მომუშავე ექსპერტები აღნიშნავენ, რომ საჭიროა, მეტი გაკეთდეს ტრეფიკინგის მსხვერპლთა ვინაობის დასადგენად, მათ დასახმარებლად, ასევე ეფექტიანი გამოძიების ჩასატარებლად და პასუხისმგებელი პირების გამოსავლენად.
ჯგუფი დადებითად აფასებს საქართველოს მიერ წინა ანგარიშში მითითებული რეკომენდაციების შესრულებას. დოკუმენტში აღნიშნულია, რომ შეიცვალა სისხლის სამართლის კოდექსი, რომელსაც დაემატა ახალი თავი დაზარალებული არასრულწლოვნების შესახებ. ასევე ანგარიშში საუბარია, რომ საქართველოში შეიქმნა სპეციალური მობილური ჯგუფები ქუჩაში მყოფი ბავშვების დასაცავად და დასახმარებლად. GRETA ასევე მიესალმება ტრეფიკინგის შესახებ ერთიანი ბაზის შექმნას.
2016 წლის ანგარიშის თანახმად, ბოლო ხუთი წლის განმავლობაში საქართველოში ტრეფიკინგის მსხვერპლად 80-მდე ადამიანი იქნა ოფიციალურად აღიარებლი. მათი უმრავლესობა საქართველოს მოქალაქეა. მსხვერპლი ჩართული იყო იძულებით შრომაში როგორც საქართველოში, ისე საზღვარგარეთ.
ევროსაბჭოს ექსპერტთა ჯგუფის მიერ გამოქვეყნებულ დოკუმენტში ნათქვამია, რომ მიღწეული პროგრესის მიუხედავად, რჩება საკითხები, რომლებიც შეშფოთებას იწვევს და სასწრაფო რეაგირებას მოითხოვს.
GRETA მოუწოდებს საქართველოს ხელისუფლებას, გადადგას მომდევნო ნაბიჯები ტრეფიკინგის მსხვერპლთა დროული იდენტიფიცირებისთვის და განსაკუთრებული ყურადღება არასრულწლოვანი მსხვერპლის დახმარებაზე გაამახვილოს.
ტრეფიკინგის საკითხებში ევროსაბჭოს ექსპერტთა ჯგუფმა საქართველოს შესახებ პირველი ანგარიში 2012 წელს გამოაქვეყნა.
