საქართველოს მთავრობა პარლამენტისგან, საარჩევნო და პოლიტიკური პროცესის დროს ძალადობაზე სანქციების გამკაცრების შესახებ კანონპროექტის დაჩქარებული წესით განხილვას ითხოვს.
იუსტიციის მინისტრის თეა წულუკიანის განცხადებით, სისხლის სამართლის კოდექსს ემატება ახალი მუხლი, რომლითაც სისხლის სამართლებრივი წესით დაისჯება შემდეგი ქმედებები: საარჩევნო უბანზე ან მის მიმდებარე ტერიტორიაზე, აგიტაციის ადგილას ან მის მიმდებარე ტერიტორიაზე, კამპანიის ადგილას, კამპანიის ღონისძიების ადგილას ან მის მიმდებარე ტერიტორიაზე ცემა ან სხვა სახის ძალადობა ან ამგვარი მუქარა.
„თუკი ასეთ ქმედებას არ მოჰყვა ჯანმრთელობის მსუბუქი დაზიანებაც კი, მაშინ ამგვარ ქმედებაზე ჩვენ ვთავაზობთ პარლამენტს, რომ იყოს თავისუფლების აღვკეთა 2 წლით ვადით. თუ ამგვარ ქმედებას მოჰყვა ჯანმრთელობის დაზიანება - თავისუფლების აღკვეთა 3 წლის ვადით. ხოლო თუ საქმე გვაქვს ჯგუფურ დანაშაულთან, თავისუფლების აღკვეთა 4 წლის ვადით. ასევე მკაცრდება ცემის მუხლი. ჩვენ მივიჩნიეთ, რომ 125-ე მუხლი არის საკმაოდ სუსტი და არ აძლევს არც შინაგან საქმეთა სამინისტროს, არც პროკურატურას, საბოლოო ჯამში, არც მოსამართლეს საშუალებას, რომ ამგვარი ქმედებისადმი უფრო მკაცრი მიდგომა გამოიჩინოს“, - განაცხადა წულუკიანმა.
მისივე თქმით, მთავრობა ერთსულოვანია, რომ ამგვარი ქმედება მკაცრად დაისაჯოს, აღიკვეთოს და საქართველოს, როგორც ქვეყნის სახე, არ იყოს წიხლები, ჩხუბი, ერთმანეთთან ფიზიკური დაპირისპირება და ანგარიშსწორება.
