პარლამენტში ქორწინებასთან დაკავშირებით კონსტიტუციაში შესატან ცვლილებებზე მსჯელობენ. "რესპუბლიკური პარტიის" წევრის თამარ კორძაიას განცხადებით, მომზადებულ ცვლილებებთან დაკავშირებით პარლამენტი აბსოლუტურად არასაჭირო კანონპროექტზე მსჯელობს.
როგორც კორძაიამ ჟურნალისტებთან საუბრისას აღნიშნა, ის რაც ხდება პარლამენტში არის უსაქმურობა.
,,დღეს რაც ხდება პარლამენტში არის უსაქმურობა, რადგან აბსოლუტურად არასაჭირო კანონზე მსჯელობა ხდება. მითუმეტეს, რომ არ არის მისაღები ის ფორმა რა ფორმითაც და ტექსტებითაც საუბრობს მომხსნებელი. უბრალოდ მიჩნდება შთაბეჭდილება, რომ ამ პროექტის ინიციატორები ხვალ დაადგენენ ცოლ-ქმარს შორის სქესობრივი კავშირი თვეში რამდენჯერ უნდა იყოს - ”განაცხადა თამარ კორძაიამ.
პარლამენტში საკონსტიტუციო ცვლილებებზე პირველი მოსმენით მსჯელობენ, რომელიც კონსტიტუციაში ქორწინების განსაზღვრას ეხება. დღევანდელ პლენარულ სხდომაზე, დეპუტატებს საკონსტიტუციო ცვლილებების საერთო-სახალხო განხილვის კომისიის შედეგები ვიცე-სპიკერმა მანანა კობახიძემ გააცნო.
კობახიძის ცნობით, საყოველთაო განხილვების დროს, საზოგადოების აბსოლუტური უმრავლესობა ამ ცვლილებების მომზადებას საჭიროდ თვლიდა.
მისი თქმით, განხილვებში მონაწილე ადამიანები ეთანხმებიან, რომ კონსტიტუციაში ქორწინების განმარტება დააზუსტეს, რომ ეს არის ქალისა და მამაკაცის ერთობა.
