პოლიტიკური გაერთიანება "გირჩის" წარმომადგენლებმა პარლამენტში პლასტმასის ჭიქებში ჩასხმული მუქი ფერის სითხე მიიტანეს, რითიც სახელმწიფოს პოლიტიკა და შარდის შემოწმებისას გაღებული ხარჯები გააპროტესტეს.
გოგა ხაჩიძე აცხადებს, რომ ”ადმინისტრაციულ სამართალდარღვევათა კოდექსში” და ”პოლიციის შესახებ კანონში”, ცვლილებები უნდა შევიდეს, რათა ,,ძალოვანი სტრუქტურების წარმომადგენლებს არ ჰქონდეთ უფლება სასამართლოს განჩინების და ნებართვის გარეშე მოქალაქეები უბნებიდან და ქუჩებიდან აყარონ და იძულებით ნარკოტესტირებაზე გადაიყვანონ” . მისი თქმით, წელიწადში 15 მილიონ ლარამდე იხარჯება მოქალაქეების შარდის შემოწმებაში.
დეპუტატმა ასევე განაცხადა, რომ 56 წლის ლევან აბზიანიძეს დაალევინეს შარდმდენები და ეს ადამიანი გარდაიცვალა.
"გირჩის” წარმომადგენლებმა იურიდიულ საკითხთა კომიტეტის სხდომაზე ტრანსფარანტებიც გამოფინეს - „1 მოსწავლის წლიური ვაუჩერი 450 GEL, 1 ლიტრი შარდი 6000 GEL”, “წელიწადში სახელმწიფო იბარებს 2500 ლიტრ შარდს“.