22 მაისს ადგილობრივი თვითმმართველობის წარმომადგენლობითი ორგანოს- საკრებულოების შუალედური არჩევნები 9 ოლქში გაიმართება.
პარტია „ქართული ოცნების“ ინფორმაციით, „ქართულ ოცნება-დემოკრატიულ საქართველოს“ გლდანში ბორის ფირცხელიანი წარადგენს. ბორის ფირცხელიანი არის აფხაზეთის ომის ვეტერანი, „ქართული ოცნების“ აქტიური წევრი 2012 წლიდან.
მათივე ინფორმაციით, „ქართული ოცნებიდან“ ოზურგეთის საკრებულოს დეპუტატობის კანდიდატი ოზურგეთის ალ.წუწუნავას სახელობის სახელმწიფო დრამატული თეატრის სამხატვრო ხელმძღვანელი - ვასილ ჩიგოგიძეა. ვასილ ჩიგოგიძე არის საქართველოს ხელოვნების დამსახურებული მოღვაწე, ღირსების ორდენის კავალერი.
ოზურგეთის მუნიციპალიტეტის დაბა ნასაკირალში „ქართული ოცნების“ კანდიდატი ნონა ტუნაძეა. ის წლების განმავლობაში მუშაობდა დაბა ნასაკირალის საჯარო სკოლაში, ქიმია-ბიოლოგიის პედაგოგად, იყო დაბა ნასაკირალში ადგილობრივი საკრებულოს წევრი.
წყალტუბოს მუნიციპალიტეტში „ქართულ ოცნებას“ მურად ზაქარიაძე წარმოადგენს.
კასპის მუნიციპალიტეტის მეტეხის ადმინისტრაციულ ერთეულში „ქართული ოცნების“ საკრებულოს მაჟორიტარი დეპუტატობის კანდიდატი ალექსანდრე მერებაშვილია. ის წლების განმავლობაში მუშაობდა სხვადასხვა კერძო კომპანიებში, იყო კასპის მუნიციპალიტეტის მეტეხის ადმინისტრაცულ ერთეულში გამგებლის წარმომადგენელი.
„ქართული ოცნების“ საკრებულოს დეპუტატობის კანდიდატი ზუგდიდის მუნიციპალიტეტის სოფელ კორცხელში კი ამირან ლაგვილავაა.
გარდაბანში, კალინინოსა და ყარაჯალარის თემებს „ქართული ოცნებიდან“ ფახრადინ შარიფოვი და ვუგარ მამედოვი წარადგენენ.
„ქართული ოცნება-დემოკრატიული საქართველოს“ მაჟორიტარი კანდიდატები ამომრჩევლებს პარტიის გენერალურმა მდივანმა კახა კალაძემ და აღმასრულებელმა მდივანმა ირაკლი კობახიძემ წარუდგინეს.
