ბერძენიშვილი: ზემოქმედების ანალიზი რომ შეგვეძლოს, კანონმდებლები არ ვიქნებოდით, - განაცხადა დეპუტატმა, ლევან ბერძენიშვილმა დარგობრივი ეკონომიკისა და ეკონომიკური პოლიტიკის კომიტეტის სხდომაზე, მომხმარებელთა უფლებების შესახებ კანონპროექტზე ფინანსთა სამინისტროს შენიშვნაზე.
"მომხმარებელთა უფლებების შესახებ კანონპროექტი ითვალისწინებს ღონისძიებას, რომელთა გატარებაც გავლენას მოახდენს ვაჭრობის სფეროში მონაწილე მხარეების ფართო წრეზე და რეგულაციების მიღებამდე მიზანშეწონილია, ჩატარდეს აღნიშნული რეგულაციების ზემოქმედების ანალიზი - რა გავლენას მოახდენს აღნიშნული ღონისძიებების გატარება ეკონომიკის განვითარებაზე" - ეს შენიშვნა არ არის გაზიარებული იმ უბრალო მიზეზის გამო, რომ გაუგებარია. ეს ნებისმიერ კანონპროექტთან შემიძლია ამოვიღო პირდაპირ და ჩავწერო და თუკი ვინმე შეძლებს, რომ მართლა ასეთი ანალიზი აკეთოს და ეკონომიკის განვითარებაზე - რა, როგორ გავლენას მოახდენს, ჩვენ კანონმდებლები კი არ ვიქნებოდით, ჩვენ ვიქნებოდით მინისტრები და მოადგილეები, ჩვენ ვიმსჯელებდით და საერთოდ არ დაგვჭირდებოდა კანონები“, - განაცხადა ბერძენიშვილმა.
