17 მაისი ჰომოფობიასა და ტრანსფობიასთან ბრძოლის საერთაშორისო დღეა.
ხვალ ლგბტ აქტივისტები საჯარო შეკრებას არ გამართავენ. მიზეზად სახელმწიფოს მხრიდან მათთვის უსაფრთხოების გარანტიების ვერმიცემა სახელდება.
ლგბტ აქტივისტების დამოუკიდებელი ჯგუფის ინფორმაციით, შს მინისტრის მოადგილესთან, პრემიერის მრჩეველთან და მერიის წარმომადგენლებთან გამართულ შეხვედრებზე საჯარო უწყებების წარმომადგენლებმა განაცხადეს, რომ სახელმწიფო 17 მაისს რუსთაველის გამზირზე ლგბტ აქტივისტთა უსაფრთხოებას ვერ დაიცავდა და ალტერნატიული ლოკაციები შესთავაზეს.
საპასუხოდ, შს მინისტრის მოადგილემ არჩილ თალაკვაძემ განაცხადა, რომ უსაფრთხოების გარანტიას კანონმდებლობა იძლევა.
"პირადად არ შევხვედრივარ, ტრადიციულად ეს შეხვედრა გაიმართა ყველა დაინტერესებული მხარის მონაწილეობით. ინფორმაცია, რომელიც მათ გაავრცელეს, არის მეტწილად მცდარი. ჩვენ არანაირ ლოკაციებს არ ვთავაზობთ არავის. ვუთხარით, რომ შარშან სადაც გამართეს აქცია, თუ გადაწყვეტდნენ, ისევ იმ ადგილას ჩაეტარებინათ. პოლიცია თავის უფლებამოსილების ფარგლებში თავის ფუნქციებს შეასრულებს. რაც შეეხება გარანტიებს, რასაც ისინი ითხოვენ, პირდაპირ გიპასუხებთ, რომ გარანტიებს არა რომელიმე პოლიციელი, მათ შორის მე, არამედ კანონმდებლობა აძლევს მოქალაქეებს, ხოლო პოლიცია მოქმედებს და იცავს ამ კანონმდებლობას", - განაცხადა თალაკვაძემ.