ნაციონალურმა მოძრაობამ ახალი სახეები წარადგინა. განახლებული შემადგენლობა საზოგადოებას სიის პირველმა ნომერმა დავით ბაქრაძემ გააცნო.
ნაციონალური მოძრაობის განახლებულ შემადგენლობაში შედიან: დავით ბაქრაძე, ელენე ხოშტარია, რომან გოცირიძე, ნიკა მელია, გიორგი ტუღუში, ოთარ კახიძე, სალომე სამადაშვილი, ირაკლი აბესაძე, სერგი კაპანაძე, სერგო რატიანი.
დავით ბაქრაძემ ლეღვთახევში შეკრებილ მოსახლეობას კიდევ რამდენიმე ახალი სახე გააცნო, რომლებიც დღეიდან ნაციონალური მოძრაობის რიგებს შეუერთდნენ, ესენი არიან: ლელა ქებურია, დიმიტრი ძაგნიძე, სოფიო სიუკაევა, ნინო კვიტაიშვილი, მარიამ რამინაშვილი, ბესო წერედიანი.
დღევანდელ ბრიფინგზე დავით ბაქრაძემ განაცხადა, რომ ქვეყანას განახლება, ახალი ენერგია და ახალი ცოდნა სჭირდება. მან წინასაარჩევნოდ დაპირებები გასცა და თქვა, რომ „ქართული ოცნების 4 წლიანმა არაკომპეტენტურმა და უნიათო მმართველობამ ქვეყანა მიიყვანა კრიზისამდე,“ ბაქრაძის განცხადებით ნაციონალური მოძრაობა არის ის ძალა, რომელიც გამოიყვანს ქვეყანას კრიზისიდან.
„ქვეყანაში დაბრუნდა შევარდნაძის დროინდელი კითხვა - გვეშველება რამე? და გეტყვით რომ აუცილებლად გვეშველება. ჩვენ ვართ ასეთი გუნდი,“ - განაცხადა დავით ბაქრაძემ.
