ამერიკის შეერთებული შტატების კონგრესმენმა ტედ პომ კონგრესში სიტყვით გამოსვლისას საქართველოზე ისაუბრა.
მისი განცხადებით, საქართველო არის პატარა და ახალგაზრდა დემოკრატიული ქვეყანა ისეთ რეგიონში, რომელიც უფრო ავტორიტარული მმართველობით არის ცნობილი, ვიდრე თავისუფლებით.
„1918 წელს საქართველომ გამოაცხადა დამოუკიდებლობა, თუმცა ოთხი წლის შემდეგ საბჭოთა დათვი შეიჭრა მის ტერიტორიაზე და საქართველო საბჭოთა რესპუბლიკად გამოაცხადა. თუმცა, ქართველი ხალხის სიმტკიცემ კიდევ ერთხელ იჩინა თავი 1991 წელს საბჭოთა კავშირის დაშლის შემდეგ, როცა საქართველომ რუსეთისგან დამოუკიდებლობა გამოაცხადა. ბოლო 25 წლის განმავლობაში საქართველო იქცა ყველაზე თავისუფალ ქვეყანად რეგიონში და დღეს კონტრასტს ქმნის მის ჩრდილოეთით პუტინის დიქტატურასთან.“- აღნიშნა კონგრესმენმა.
ტედ პოს თქმით, 2008 წელს, როდესაც რუსულმა ჯარმა განახორციელა საქართველოს ტერიტორიების მესამედის ოკუპაცია, ის საქართველოში იმყოფებოდა. მისივე თქმით, რუსეთს არ მოსწონს საქართველოს სწრაფვა დემოკრატიისა და თავისუფლებისკენ.
კონგრესმენმა სიტყვით გამოსვლაში საქართველოს ბოლოდროინდელ მიღწევებზეც ისაუბრა და აღნიშნა, რომ საქართველომ უზრუნველყო ეკონომიკური ზრდა და მიაღწია მნიშვნელოვან წინსვლას დემოკრატიული საზოგადოების მშენებლობის გზაზე.
„2012 წელს მსოფლიო გახდა ერთი პარტიის მიერ დემოკრატიული გზით ხელისუფლებაში მეორის ჩანაცვლების მოწმე. ორგანიზაცია Reporters without Border-ის თანახმად, მომდევნო ოთხი წლის განმავლობაში ქვეყანაში ამაღლდა მედიის თავისუფლების დონე, ხოლო საერთაშორისო გამჭვირვალობის თანახმად, პრესის თავისუფლების კატეგორიაში საქართველო ლიდერობს რეგიონის მასშტაბით და უსწრებს კიდეც ევროკავშირის ზოგიერთ წევრ ქვეყანასა და აშშ-ის მოკავშირე სახელმწიფოებს.“- განაცხადა ტედ პომ.
მისი განცხადებით, საქართველო ლიდერობს ბიზნესისა და თავისუფალი ბაზრის კატეგორიებშიც. მსოფლიო ბანკის თანახმად, საქართველო შედის იმ 25 ქვეყნის სიაში, სადაც ბიზნესის წარმართვა ყველაზე მარტივია.
ტედ პომ აღნიშნა, რომ ამერიკის შეერთებულმა შტატებმა ხმამაღლა უნდა დააფიქსიროს თავისი პოზიცია და მხარი დაუჭიროს საქართველოს ნატოსკენ მიმავალ გზაზე. მან ასევე ხაზი გაუსვა საქართველოს წვლილს საერთაშორისო ტერორიზმთან ბრძოლაში და ქართველი ჯარისკაცების მონაწილეობას ავღანეთის მისიებში.
„ამერიკის შეერთებულმა შტატებმა და ჩვენმა მოკავშირეებმა ნატოში უნდა გამოიჩინონ სიმტკიცე და მხარი დაუჭირონ საქართველოს. საქართველო არის სუვერენული ქვეყანა და მის საზღვრებს პატივისცემით უნდა მოეპყრას ყველა, თავად პუტინიც კი. რუსეთმა კარგად იცის, რომ საქართველო არის რეგიონში დემოკრატიის სიმბოლო. სწორედ ამიტომ აგრძელებს პუტინი იარაღის ჟღარუნს მთელ რეგიონში. დიქტატორმა პუტინმა იცის, რომ თუკი საქართველო იქნება წარმატებული დემოკრატიის მაგალითი, საქართველოს მეზობლებსაც გაუჩნდებათ მიბაძვისა სურვილი და უფრო დემოკრატიული სახელმწიფოს შექმნისკენ სწრაფვა.თავისუფლებისკენ მიმავალ გზაზე საქართველოს და მისი დემოკრატიული მისწრაფებების მხარდაჭერა ჩვენს ეროვნულ ინტერესებში შედის.“
ამერიკელმა კონგრესმენმა სიტყვით გამოსვლა ჯონ კენედის სიტყვებით დაასრულა.
„დაე, ყველა ერმა იცოდეს, მიუხედავად იმისა, მტერია ის თუ მოყვარე, რომ ჩვენ ყველაფერს გავიღებთ, ვიტვირთებთ ნებისმიერ ტვირთს, მხარს დავუჭერთ ყველა მეგობარს, დავუპირისპირდებით ყველა მოწინააღმდეგეს, რათა თავისუფლება არ დასამარდეს, არამედ, პირიქით, აყვავდეს“.- ეს სიტყვები საქართველოსაც გულისხმობს, ბატონო თავმჯდომარევ, და ამას ვერსად ვერ გავექცევით", - განაცხადა ტედ პომ კონგრესში გამოსვლისას.
