საქართველოს პრეზიდენტი პრემიერ-მინისტრს, პარლამენტის სპიკერსა და ცესკოს თავმჯდომარეს შეხვდა. შეხვედრა პრეზიდენტის ადმინისტრაციაში გაიმართა. გავრცელებული ინფორმაციით, საუბარი წინასაარჩევნო კამპანიის გამოცხადების თარიღთან დაკავშირებულ საკითხს შეეხებოდა.
სავარაუდოდ, სწორედ არჩევნებთან დაკავშირებული ახალი განკარგულება იქნება სპეციალური განცხადების თემაც, რომელსაც საქართველოს პრეზიდენტი რამდენიმე წუთში, ზუსტად 19 საათზე გააკეთებს.
გიორგი მარგველაშვილმა ახალი განკარგულების მაისში გამოცემის შესახებ მას შემდეგ განაცხადა, რაც პრემიერ-მინისტრმა პრეზიდენტის პირველ განკარგულებას, წინასაარჩევნო თარიღად 8 აგვისტოს გამოცხადების შესახებ, ხელი არ მოაწერა. პრემიერმა პრეზიდენტს სთხოვა წინასაარჩევნო პერიოდად 3 თვე განსაზღვრულიყო.
აღნიშნულ საკითხზე პრეზიდენტისა და მთავრობის ადმინისტრაციებს შორის ამ ხნის განმავლობაში მწვავე დებატები მიმდინარეობდა. არასამთავრობო სექტორმა მათ კონსულტაციებისაკენ მოუწოდა.
