საქართველოს ეროვნული უშიშროების საბჭოს, მდივნის ირინა იმერლიშვილის ინფორმაციით, საქართველოს პრეზიდენტს საარჩევნო საკითხებთან დაკავშირებით კონსულტაციები ჰქონდა პრემიერ-მინისტრთან და პარლამენტის თავმჯდომარესთან.
როგორც ირინა იმერლიშვილმა ჟურნალისტებს განუცხადა, მისი ინფორმაციით, ამ საკითხზე გადაწყვეტილება უახლოეს ხანში იქნება მიღებული.
გიორგი მარგველაშვილმა ახალი განკარგულების მაისში გამოცემის შესახებ მას შემდეგ განაცხადა, რაც პრემიერ-მინისტრმა პრეზიდენტის პირველ განკარგულებას, წინასაარჩევნო თარიღად 8 აგვისტოს გამოცხადების შესახებ, ხელი არ მოაწერა. პრემიერმა პრეზიდენტს სთხოვა წინასაარჩევნო პერიოდად 3 თვე განსაზღვრულიყო.
აღნიშნულ საკითხზე პრეზიდენტისა და მთავრობის ადმინისტრაციებს შორის ამ ხნის განმავლობაში მწვავე დებატები მიმდინარეობდა. არასამთავრობო სექტორმა მათ კონსულტაციებისაკენ მოუწოდა.
