საპარლამენტო უმცირესობის მიერ პარლამენტში გარემოს დაცვის მინისტრის დაბარებას და კომიტეტის სხდომის ჩატარების მოთხოვნას, პარლამენტის გარემოს დაცვისა და ბუნებრივი რესურსების კომიტეტის თავმჯდომარე გია ჟორჟოლიანი პასუხობს. მისი თქმით, პარასკევს 3 საათზე ისედაც ჩატარდება კომიტეტის სხდომა.
"ნაციონალური მოძრაობის საარჩევნო კამპანიაში ჩვენ ვერ ჩავერთვებით, მოვუწოდე არასამთავრობო ორგანიზაციებს, ყველა ექსპერტს, რომ ჩვენ მზად ვართ განვიხილოთ ნებისმიერი საკითხი რომელიც საზოგადოებისათვის აქტუალურია. ჩვენ პარასკევს 3 საათზე ისედაც გვაქვს კომიტეტი, ჩვენ მზად ვართ ეს საკითხიც განვიხილოთ “ - განაცხადა ჟორჟოლიანმა
საქართველოს პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის თქმით, ბოტანიკური ბაღის განვითარებაში სერიოზული ინვესტიციაა ჩადებული.
"ჩვენი მომავალი თაობა სულ მცირე დატკბება იმ შედეგად რასაც ეს პროექტი მოიტანს. უბრალოდ ბევრი შეჩვეულია, რომ სიკეთეს უნდა ებრძოლოს. ვისაც ბიძინა ივანიშვილზე მეტი სიკეთის გაკეთება შეუძლია შეეჯიბროს. ძალიან სერიოზული ინვესტიციაა ჩადებული ბოტანიკური ბაღის განვითარებაში და ეს ასე გაგრძელდება“ - განაცხადა სესიაშვილმა.
