საბურთალოს რაიონის გამგებელი ბექა მიქაუტაძე საირმის ქუჩაზე მცხოვრებ ახალგაზრდებს შეხვდა და საირმის ქუჩაზე მდებარე კალათბურთის მოედნის რეაბილიტაციას დაჰპირდა.
დედაქალაქის მერიის ინფორმაციით, შეხვედრა ადგილობრივი მოსახლეობის თხოვნით გაიმართა, მათ გამგებელს აუხსნეს, თუ რამდენად საჭიროა ამ უბანში სპორტული მოედნის კეთილმოწყობა.
გამგებელთან ერთად შეხვედრაზე მისი მოადგილეეებიც იმყოფებოდნენ და მათ ერთად დაათვალიერეს დაზიანებული ინფრასტრუქტურა.
„სტადიონი, ფაქტობრივად, აღარ არსებობს. მოედანზე, რომელსაც საფარიც კი არასდროს ჰქონია, ხე-მცენარეებია ამოსული, დაზიანებულია მესერი, შეიძლება ითქვას, რომ ობიექტი საჭიროებს არა რეაბილიტაციას, არამედ თავიდან მოწყობას. ახალგაზრდებს ჩვენ შევთავაზეთ თავად აერჩიათ სტადიონის საფარის ნიმუშებიდან სასურველი და დავპირდით, რომ უახლოეს მომავალში შემსრულებელ კომპანიასთან გაფორმდება ხელშეკრულება და დაიწყება სამუშაოები“, - განაცხადა ბექა მიქაუტაძემ.
ადგილობრივებმა გამგებელს პირობა მისცეს, რომ სტადიონის რეაბილიტაციის დასრულების შემდეგ ისინი თავად იზრუნებენ ობიექტის მოვლა-პატრონობაზე.