"თავისუფალი დემოკრატების" წევრი გია ცაგარეიშვილი "კომპანიონ ცხოველთა შესახებ" კანონპროექტის ინიცირებას გეგმავს. დღეს გამართულ პრესკონფერენციაზე დეპუტატმა განაცხადა, რომ კანონპროექტის შემუშავების მიზანია, ადამიანისა და ცხოველის თანაცხოვრების პირობებში მოხდეს, ერთი მხრივ, ადამიანის უფლებებისა და უსაფრთხოების, ხოლო მეორე მხრივ, ცხოველთა სიცოცხლისა და ჯანმრთელობის დაცვა გონივრული ბალანსის უზრუნველყოფის მეშვეობით.
ცაგარეიშვილის განცხადებით, პროექტში გაწერილია კომპანიონ ცხოველთა კეთილდღეობის ძირითადი საჭიროებები, რაც თავის მხრივ გულისხმობს ბიოლოგიური წონასწორობის პირობებში, თანაბარი არსებობის შესაძლებლობასა და ცხოველთა ტკივილისა და ტანჯვისაგან დაცვას.
აღნიშნული კანონპროექტის ავტორები "ცხოველთა უფლებების კომიტეტი", ცხოველთა დაცვის ორგანიზაცია "ჰუმანიმალი" და "სოციალური პროგრამებისა და განვითარების ცენტრი" არიან.
