თბილისის სახელმწიფო უნივერსიტეტში განვითარებულ მოვლენებზე დღეს, 20:00-ზე, განათლებისა და მეცნიერების სამინისტროში იმსჯელებენ. სამინისტრო მიმართავს უნივერსიტეტის ადმინისტრაციას, პარიტეტული პრინციპით შეარჩიოს ყველა დაინტერესებული ჯგუფის წარმომადგენელი.
საქართველოს პრემიერმინისტრმა გიორგი კვირიკაშვილმა ცოტა ხნის წინ განათლების მინისტრს თამარ სანიკიძეს დაავალა, შეხვდეს სახელმწიფო უნივერსიტეტის სტუდენტებს, აკადემიურ პერსონალს და ხელმძღვანელ პირებს, რათა შექმნილი პრობლემა უმოკლეს ვადებში გადაიჭრას. პრემიერის განცხადებით, "მთავრობა ვალდებულია, მიიღოს ყველა ზომა, რათა სასწავლო პროცესი დაუბრუნდეს ნორმალურ კალაპოტს".
გიორგი კვირიკაშვილმა ასევე დაავალა შინაგან საქმეთა სამინისტროს, სასწრაფოდ განმუხტოს ვითარება და გააძლიეროს უსაფრთხოების ზომები.