საქართველოს განათლებისა და მეცნიერების სამინისტრო ივანე ჯავახიშვილის სახელობის თბილისის სახელმწიფო უნივერსიტეტში განვითარებულ მოვლენებს ეხმაურება.
როგორც სამინისტროს მიერ გავრცელებულ განცხადებაშია აღნიშნული, უწყება მზადყოფნას გამოთქვამს, ითანამშრომლოს ყველა დაინტერესებულ მხარესთან თუ სტუდენტთა ნებისმიერი გაერთიანების წარმომადგენლებთან, რათა,, საკანონმდებლო სივრცე მაქსიმალურად უზრუნველყოფდეს უმაღლესი საგანმანათლებლო დაწესებულებების მართვის გამჭვირვალე და სამართლიან სისტემას სტუდენტებისა და აკადემიური პერსონალის აქტიური ჩართულობით.
„უნივერსიტეტი უპირველეს ყოვლისა აკადემიური საქმიანობის სივრცეა, სადაც სრული ავტონომიის პირობებში, სტუდენტებსა და აკადემიურ პერსონალს დამოუკიდებლად სწავლის, სწავლებისა და კვლევის, ასევე საკუთარი აზრისა და მოქალაქეობრივი პოზიციის თავისუფლად გამოხატვის შესაძლებლობა უნდა ჰქონდეს.
მიუღებელია უნივერსიტეტის საქმიანობაში გარე ძალების, სახელმწიფო სტრუქტურების თუ სხვა პოლიტიკური ჯგუფების ჩარევა ნებისმიერი ფორმით, ისევე როგორც სტუდენტებზე ზემოქმედების მცდელობა. დაუშვებელია უნივერსიტეტში მიმდინარე პროცესების პოლიტიზირება.
გამოვთქვამთ მზადყოფნას, ვითანამშრომლოთ ყველა დაინტერესებულ მხარესთან თუ სტუდენტთა ნებისმიერი გაერთიანების წარმომადგენლებთან, რათა საკანონმდებლო სივრცე მაქსიმალურად უზრუნველყოფდეს უმაღლესი საგანმანათლებლო დაწესებულებების მართვის გამჭვირვალე, თანასწორუფლებიან და სამართლიან სისტემას სტუდენტებისა და აკადემიური პერსონალის აქტიური ჩართულობით“,- აღნიშნულია განცხადებაში.
განათლების სამინისტრო იმედს გამოთქვამს, რომ უზრუნველყოფილი იქნება პრობლემის კონსტრუქციული დიალოგის გზით გადაჭრა.
„ვიმედოვნებთ, რომ სტუდენტები, აკადემიური პერსონალი, უნივერსიტეტის მმართველი ორგანოები და ადმინისტრაცია უზრუნველყოფენ უნივერსიტეტში არსებული პრობლემების გადაჭრას კონსტრუქციული დიალოგის გზით, რათა არ მოხდეს სტუდენტების შორის დაპირისპირება ან ნებისმიერი სახის პროვოკაცია.
ღრმად გვწამს, რომ სხვადასხვა პოზიციის მქონე სტუდენტებს უნივერსიტეტის უკეთესი მომავლის სურვილი ამოძრავებთ, რამაც ყველა უნდა გაგვაერთიანოს“,- აღნიშნულია განათლების სამინისტროს მიერ გავრცელებულ განცხადებაში.
ივანე ჯავახიშვილის სახელობის თბილისის სახელმწიფო უნივერსიტეტში ორი საპირისპირო აქცია მიმდინარეობს.
კონტრაქციების ერთი მხარე მოითხოვს, რომ ადმინისტრაციის ხელმძღვანელის თანამდებობაზე გიორგი გაფრინდაშვილმა კენჭი არ იყაროს. ისინი ასევე, მოითხოვენ გამოძიების დაწყებას და თვითმმართველობის რეორგანიზაციას.
მეორე მხარე კი, რომელსაც თვითმმართველობის ძირითადი ნაწილი წარმოადგენს, გაფრინდაშვილის მიმართ გამოთქმულ ბრალდებებს უსაფუძვლოს უწოდებს.
