თბილისის სახელმწიფო უნივერსიტეტის რექტორი ლადო პაპავა უნივერსიტეტში მიმდინარე მოვლენებს პრესკონფერენციაზე გამოეხმაურა და განაცხადა, რომ არ უნდა მოხდეს მოვლენების პოლიტიზება.
,,14 ცნობილი ქართველი ღვაწლმოსილი პროფესორი ხელს აწერს შესანიშნავს განცხადებას, სადაც მათ მოუწოდეს ყველას, განსაკუთრებით პოლიტიკურ ძალებს, გაუფრთხილდნენ უნივერსიტეტს, გაუფრთხილდნენ ადგილს, სადაც სწავლობენ პოლიტიკოსების შვილები, დები, ძმები და არ მოახდინონ უნივერსიტეტის პოლიტიზება. მე ვფიქრობ, ქართველ პოლიტიკოსებში არის ის ჯანსაღი მუხტი, რომ უნივერსიტეტის პოლიტიზებაში არანაირი მონაწილეობა არ მიიღონ", - განაცხადა ლადო პაპავამ.
თბილისის სახელმწიფო უნივერსიტეტის სტუდენტების პროტესტი გრძელდება. ცოტა ხნის წინ მათთან საპარლამენტო უმრავლესობის დეპუტატი მივიდა. დავით ბერძენიშვილს სურდა სტუდენტების პრეტენზიებსა და უნივერსიტეტში არსებულ პრობლემებს გაცნობოდა. თუმცა სტუდენტებმა ამ თემაზე დეპუტატთან საუბარი არ ისურვეს. სტუდენტები აცხადებენ, რომ ისინი ყველა პოლიტიკურ პარტიას ემიჯნებიან და არ სურთ, რომ აქციის პოლიტიზება მოხდეს.
თსუ-ში ორი დღეა სტუდენტები აქციას მართავენ. უნივერსიტეტის სტუდენტების ნაწილი კანცლერის არჩევნებს პროტესტს უცხადებს. თბილისის სახელმწიფო უნივერსიტეტში გუშინ, სენატის სხდომა ჩაიშალა. ამის მიზეზი გახდა სტუდენტების ერთი ჯგუფის აქცია, რომელიც უნივერსიტეტის კანცლერად გიორგი გაფრინდაშვილის კანდიდატურას ეწინააღმდეგება.
