საქართველოს პრეზიდენტის მრჩეველი ადამიანის უფლებატა საკითხებში კახა კოჟორიძე ტყიბულში ჩავიდა და გაფიცულ მეშახტეებს შეხვდა. მან მაღაროელებს მოუწოდა, რომ პროტესტი კანონის ფარგლებში გამოხატონ.
"ფაქტი არის ის, რომ პრობლემები მართლაც მწვავედ დგას დღის წესრიგში და ამ პრობლემებს სჭირდება სწორი და გონივრული გადაწყვეტა. ყველასადმი ჩემი თხოვნა იქნება ის, რომ ცხადია, მათი გადასაწყვეტია, როდემდე და როგორ გააგრძელებენ ამ პროტესტს, ეს არის მათი კონსტიტუციური უფლება, მაგრამ ეს არ უნდა გასცდეს კანონმდებლობით დადგენილ აკრძალვას", - თქვა კახა კოჟორიძემ.
იგი ამჟამად საქნახშირი ,,ჯი-აი-ჯის“ ადმინისტრაციასაც ხვდება. შეხვედრების შემდეგ ტყიბულში მიმდინარე მოვლენებთან დაკავშირებით, პრეზიდენტის ადმინისტრაციის პოზიცია გახდება ცნობილი.
გაფიცული მაღაროელების ძირითადი მოთხოვნა ხელფასის გაზრდაა. ისინი გუშინ კომპანია საქნახშირი ჯი-აი-ჯის ადმინისტრაციაშიც შეიჭრნენ. კომპანიის განცხადებით, მათ კერძო საკუთრება დაარბიეს. დღეს მეშახტეები ამბობენ, რომ გუშინდელი შეჭრა "მთავრობის მიმართ გაფრთხილება" იყო.