100- ქულიანი საჯარიმო სისტემა, სავარაუდოდ, შეიცვლება, - ამის შესახებ ”ჯი-ეიჩ-ენს” პარლამენტის იურიდიული კომიტეტის თავმჯდომარემ, ვახტანგ ხმალაძემ განუცხადა.
მისი თქმით, მთავრობა და დეპუტატები ფიქრობენ, რომ 100-ქულიანი სისტემის წესი შემოღებული უნდა იქნას და ეს არ შეიცვლება, რადგან, მისივე თქმით, „პრინციპი ემსახურება იმას, რომ წესრიგი იქნას დაცული. ვიღაცამ კი ამისთვის თავის არიდება ჯარიმის, ანუ ფულის გადახდით არ უნდა შეძლოს“.
თუმცა, როგორც ხმალაძე ამბობს, შეიცვლება ის პრინციპი, რომ 100-ქულიანი ლიმიტის ამოწურვის შემდეგ პირს მართვის უფლება ჩამოერთმევა და ამ უფლების მოპოვება მხოლოდ 2 თვის შემდეგ, გამოცდის თავიდან ჩაბარების საფუძველზე ექნება.
„თუკი 100 საჯარიმო ქულა დაგროვდა, პირს მართვის უფლება უფრო ხანგძლივი ვადით - 4-5-6 თვით უნდა შეუჩერდეს და არა ჩამოერთვას. ხოლო, თუ ამ პირს უნდა, მართვის უფლება უფრო ადრე მოიპოვოს, მაშინ გავიდეს, გამოცდა ჩააბაროს და დაადასტუროს, რომ მან მანქანის მართვაც იცის, მოძრაობის წესებიც იცის და მაშინ მას მართვის უფლება გამოცდის ჩაბარებისთანავე აღუდგება. მაგრამ, თუკი მას გამოცდაზე გასვლა არ სურს, მაშინ ის რამდენიმე თვის განმავლობაში მანქანას ვერ ატარებს, შემდგომ კი, გამოცდის ჩაუბარებლად მანქანის მართვას ხელახლა შეძლებს“ , - ამბობს ხმალაძე.
ამას კი იმით ხსნის, რომ საზოგადოების გარკვეული ნაწილისთვის გამოცდის ჩაბარება დისკომფორტის შემქმნელია და ამით ესაც იქნება თავიდან აცილებული.
გარდა ამისა, ხმალაძე ამბობს, რომ გადაიხედება ცალკეული დარღვევისთვის პორექტით განსაზღვრული ქულები. თუმცა, ჯერჯერობით ვერ აკონკრეტებს და ამბობს, რომ საკომიტეტო განხილვებისას შეჯერდებიან, რა დარღვევა რამდენი ქულით შეფასდეს.
მთავრობის ამ ინიციატივის განხილვას პარლამენტი მიმდინარე კვირიდან დაიწყებს.
