ჩინეთის ჩრდილო დასავლეთ ნაწილში საბავშვო ბაღზე შეიარაღებული თავდასხმის განხორციელების შედეგად 6 ბავშვი და ერთი მასწავლებელი დაიღუპა, ხოლო 20 ბავშვი დაიჭრა. ინციდენტი დილით მოხდა.
თავდასხმის დეტალები ჯერჯერობით უცნობია, თუმცა ჩინური მედიის მიერ გავრცელებული ინფორმაციით ბავშვები და მასწავლებელი "დაჩეხეს".
უცნობია ასევე თავდამსხმელის ვინაობა, რომელმაც შეიარაღებული თავდასხმის შედეგად სიცოცხლე თვითმკვლელობით დაასრულა. ამ ინფორმაციას ქალაქ ხანჩჟუის ადმინისტრაციის უფროსი ავრცელებს. ხოლო სხვა წყაროებიდან ეს ინფორმაცია არ დასტურდება.
თავდასხმის შედეგად დაზარალებული საავადმყოფოში იქნა გადაყვანილი. ასევე არ ვრცელდება ინფორმაცია დაზარალებულების ასაკისა და მათი ჯანმრთელობის მდგომარეობის შესახებ.
დასავლური მედიის ინფორმაციით, ბავშვების წინააღმდეგ დანაშაული ჩადენილ იქნა, მიუხედავად იმისა, რომ ჩინეთის მთელს ტერიტორიაზე გაძლიერებით იცავენ სკოლებს და სასწავლო დაწესებულებებს და იქ პოლიციის დამატებითი განყოფილებებია განთავსებული.
აღსანიშნავია, რომ გასული ორი კვირის განმავლობაში ჩინეთში სკოლამდელი აღზრდის დაწესებულებებზე თავდასხმა ორჯერ განხორციელდა. პირველ შემთხვევაში თავდამსხმელმა ბავშვებს დაზიანებები ჩაქუჩით მიაყენა, მეორე შემთხვევაში კი დაწყებითი კლასების მოსწავლეებთან დანით შეიარაღებული ადამიანი შეიჭრა და ბავშვები დაჭრა.
ექსპერტები ამგვარი შეტევების ერთ-ერთ მიზეზად თანამედროვე საზოგადოების ადამიანის ფსიქიკაზე ზეწოლას ასახელებენ.