უკრაინის შინაგან საქმეთა მინისტრმა არსენ ავაკოვმა მიიღო გადაწყვეტილება ყველა სამართალდამცავი სტრუქტურის განსაკუთრებულ რეჟიმზე გადაყვანის შესახებ, - ამასთან დაკავშირებით, განცხადება მინისტრმა facebook-ის საკუთარ გვერდზე გამოაქვეყნა. იგი მოუწოდებს მოსახლეობას გაგებით მოეკიდონ უსაფრთხოების გამკაცრებულ ზომებს და თავი შეიკავონ დემონსტრაციების ორგანიზებისგან.
მინისტრი ასევე მიმართავს მოსახლეობას, რომ საეჭვო პირების, ან გარემოებების შემჩნევის შემთხვევაში, მიმართონ სამართალდამცავ სტრუქტურებს, ან დარეკონ 102-ზე.
მინისტრი განმარტავს, რომ უკრაინის შინაგან საქმეთა სამინისტროსა და უშიშროების სამსახურს გააჩნია ინფორმაცია კიევში, ხარკოვში, დნეპროპეტროვსკში, ლვოვსა და სხვა დიდ ქალაქებში მოსალოდნელი ტერორისტული აქტებისა და პროვოკაციების შესახებ.
"დღეს მოვისმინე შსს-ს ოპერატიული სამსახურების მოხსენება, რომელშიც შესულია უშიშროების სამსახურის ინფორმაციაც და მივიღე გადაწყვეტილება თითოეულ თქვენგანს მოგმართოთ. ოპერატიული სამსახურების მონაცემებით, უახლოესი დღეების განმავლობაში მოგვიწევს გადავიტანოთ დესტრუქციული, ანტიუკრაინული ძალების მცდელობები, განახორციელონ ქვეყანაში დესტაბილიზაცია", - აცხადებს მინისტრი.
