ორმხრივი თანამშრომლობის გაღრმავების დეკლარაციის ხელმოწერის შემდეგ, საქართველოს და აზერბაიჯანის პრეზიდენტებმა მედიისათვის ერთობლივი განცხადებები გააკეთეს.
საქართველოს პრეზიდენტმა ილჰამ ალიევს საქართველოში სტუმრობისათვის მადლობა გადაუხადა და აღნიშნა, რომ ეს ვიზიტი უაღრესად მნიშვნელოვანია ჩვენს ქვეყნებს შორის სტრატეგიული თანამშრომლობის გაღრმავების თვალსაზრისით.
„ოცი წლის წინ, ჩვენს ერებს შორის არსებული დადებითი ურთიერთობის ფონზე, საფუძველი ჩაეყარა ჩვენს ქვეყნებს შორის სტრატეგიულ თანამშრომლობას, რამაც ძალიან მნიშვნელოვანი როლი შესძინა როგორც აზერბაიჯანს, ისე საქართველოს და კავკასიის რეგიონს. დღვანდელ შეხვედრაზე ჩვენ ვისაუბრეთ იმ სტრატეგიული თანამშრომლობის შესახებ, რომელიც გვაკავშირებს აზერბაიჯანთან. იმ ძალიან შორს მიმავალი გეგმების შესახებ, რომელიც უკავშირდება კასპიის ზღვასა და შავ ზღვას და ვისაუბრეთ სატრანსპორტო და ენერგეტიკული პროექტების გაღმავების თაობაზე.
ხელი მოვაწერეთ ერთობლივ დეკლარაციას, რომელიც ასევე შეუწყობს ხელს თანამშრომლობასა და ურთიერთობის გაღრმავებას უსაფრთხოების, სავაჭრო-ეკონომიკური, სატრანზიტო და კულტურული ურთიერთობების თვალსაზრისით.
ჩვენს ქვეყნებს შორის ურთიერთობები ეფუძნება იმ კეთილმეზიბლურ სულისკვეთებას, რომელმაც სერიოზულ გამოცდებს გაუძლო. მე მახსენდება 2008 წელი, რუსეთის ოკუპაცია და აზერბაიჯანის ძალიან პრინციპული პოზიცია. ბუნებრივია, მომავალშიც ჩვენი ურთიერთობა გაუძლებს ნებისმიერი ტიპის გამოცდას. ბუნებრივია, რომ ფუნდამენტი ამ ურთიერთობისა გაღრმავებულია სამთავრობათაშორისო ურთიერთობით, იმ მნიშვნელოვანი პროექტებით, რომლებსაც ჩვენ ერთად ვახორციელებთ.
ჩვენ მადლობელი ვართ არამარტო პარტნიორობისათვის, რომელიც გვაკავშირებს აზერბაიჯანთან, არამედ მადლობლები ვართ იმ პროექტებისათვის, რომლებსაც აზერბაიჯანი საქართელოში ახორციელებს. აზერბაიჯანი საქართველოს ეკონომიკის სერიოზულ მხარდაჭერას ახორციელებს. ნებისმიერმა ქართველმა იცის, თუ რა დახმარებას გვიწევენ ჩვენი აზერბაიჯანელი პარტნიორები საბავშვო ბაღბის, ეკლესიების, სხვადასხვა საგანმანათლებლო და სპორტული პროექტების განვითარებში და ამ თალსაზრისით ჩვენ ვართ მადლობელი. თავის მხრივ ქართველი ხალხი იქნება ყოველთვის მოძმე აზერბაიჯანელი ხალხის გვერდით.
მიუხედავად იმისა, რომ ჩვენ გვაქვს რთული ვითარება, გვაქვს დარღვეული ტერიტორიული მთლიანობა, ჩვენი ოკუპირებული ტერიტორიების მიმართ ხორციელდება ოკუპაციის კიდევ უფრო გაღრმავების პოლიტიკა, ჩვენ ყოველთვის ვიყავით ამ დერეფნის ერთგული პატრიოტები და ურთულეს მომენტებშიც ვაჩვენებთ, რომ ვართ ერთგული ამ სატრანზიტო ფუნქციის. საქართველო იყო და არის ევროპასა და აზიას შორის კარიბჭე და მზად ვართ გავაღრმავოთ ჩვენი ურთიერთობა და თანამშრომლობა ამ მიმართულებით.
ის პროექტები, რომლებზეც ჩვენ ვსაუბრობთ ხორციელდება და მათი პერსპექტივა არის ევროპაში ენერგეტიკული და სატრანსპორტო თანამშრომლობის გაღრმავება და ამავე მიმართულულებით კასპიის ქვეყნების უფრო აქტიური ჩაბმულობის მიმართულებით.
დარწმუნებული ვარ, რომ ამ პროექტებს დიდი პერსპექტივა გააჩნია. მაგრამ არამარტო კასპიის ზღვის რეგიონისათვის, არამედ უფრო გლობალურადაც, ჩინეთის ჩართვით და დიდი დერეფნის განვითარების თვალსაზრისით და ჩვენ აქაც ვხედავთ ერთმანეთს პარტნიორებად. ვისაუბრეთ გლობალურად რეგიონში არსებულ ვითარებაზე, სტაბილურობასა და მის მნიშვნელობაზე;
ვისაუბრეთ იმ პატივისცემაზე, რომელსაც გამოვხატავთ ერთმანეთის მიმართ, ერთმანეთის ტერიტორიული მთლიანობის, საერთაშორისო სამართლისა და გაეროს ფუძემდებლური პრინციპების მიმართ და დავადასტურეთ ჩვენი ერთგულება საზღვრების ურღვეობის მშვიდობიანი მოგვარების და ერთმანეთის სუვერენიტეტისა და ტერიტორიული მთლიანობის პატივისცემის თვალსაზრისით.
მინდა მივულოცო ბატონ ილჰამს და ჩვენს აზერბაიჯანელ მეგობრებს საპარლამენტო არჩევნების წარმატებით ჩატარება“, - განაცხადა საქართველოს პრეზიდენტმა.
აზერბაიჯანის პრეზიდენტის ილჰამ ალიევის განცხადებით, დღეს ორმხრივი ურთიერთობების გაღრმავების შესახებ ხელმოწერილ დეკლარაციაში კონკრეტული მოსაზრებებია გამთქმული, კონფლიქტების მოგვარების კუთხით.
აზერბაიჯანის პრეზიდენტის აზრით, ყველა კონფლიქტი, მათ შორის, საქართველოს და აზერბაიჯანის ტერიტორიაზე არსებული კონფლიქტები, ქვეყნების სუვერენიტეტისა და საზღვრების დაცვის პრინციპით უნდა მოგვარდეს.
„ეკონომიკურ სფეროში საქართველოსთან გვაქვს ძალიან წარმატებული თანამშრომლობა. ეს არის ორმხრივი ინტერესები, აზერბაიჯანი დებს ინვესტიციებს საქართველოში, საქართველოც ინვესტიციებს დებს აზერბაიჯანში. ჩვენს ქვეყნებში ძალიან კარგი ატმოსფეროა შექმნილი ამ ინვესტიციებისთვის. ცხადია, ჩვენ დღეს ფართოდ მიმოვიხილეთ ენერგეტიკული და სატრანსპორტო შესაძლებლობები. მოხარული ვარ, რომ საქართველოსთან არცერთ საკითხთან დაკავშირებით არ გვაქვს წინააღმდეგობა და აზრთა სხვადასხვაობა.
ჩვენ ვართ მეგობრები, ჩვენ ვართ ძმები და დღევანდელი ჩვენი წარმატებული შეხვედრა და ვიზიტი, ჩვენი სამომავლო დინამიური განვითარებისთვის წარმატებული ნაბიჯია.
თავის დროზე, ბაქო-სუფსა-თბილისი-ჯეიჰანი და ერზრუმის გაზსადენები რომ არ აშენებულიყო, დღეს ჩვენ ვერ ვილაპარაკებდით სამხრეთის ნაკადზე, არ გვექნებოდა ამაზე საუბრის ფუფუნება.
დღეს ეს საქართველოსთვის, აზრებაიჯანისთვის და ევროპისთვის დიდი ეკონომიკურ-პოლიტიკური მნიშვნელობის მქონეა.
ნაბიჯ-ნაბიჯ ეს პროექტი წარმატებულად ხორციელდება და მე ვიმედოვნებ, რომ 2018 წელს თურქეთში და 2020 წლისათვის უკვე ევროპის ბაზარზე გავა აზერბაიჯანული გაზი.
ეს არის უდიდესი ენერგეტიკული პროექტი, რომელშიც 45 მილიარდი დოლარი ინვესტიცია განხორციელდება.
აზერბაიჯანს გაზის დიდი რეზერვუარები გააჩნია, ეს იმას ნიშნავს რომ აზერბაიჯანს, ასი წლის შემდეგაც შეუძლია არამარტო თავისი თავი, არამედ ბაზარი და მეზობლები დააკმაყოფილოს და კიდევ ევროპაშიც გაიტანოს“, - განაცხადა ალიევმა.
ილჰამ ალიევმა საქართველოს პრეზიდენტს სტუმართმოყვარეობისთვის მადლობა გადაუხადა.
