აშშ-ის პრეზიდენტ დონალდ ტრამპის ადმინისტრაცია ვენესუელის პრეზიდენტ ნიკოლას მადუროს დასამხობად აგრესიულ სამხედრო სცენარებს ამუშავებს, რომლებიც ასევე მოიცავს საჰაერო დარტყმებს და სპეციალური დანიშნულების რაზმების ოპერაციებს მადუროს დასაკავებლად ან მის ლიკვიდაციას.

ამის შესახებ The New York Times იუწყება.

გამოცემა, რამდენიმე ამერიკელ მარალჩინოსანზ დაყრდნობით აღნიშნავს, რომ აშშ-მა, შესაძლოა, ზომები მიიღოს ქვეყნის ნავთობის საბადოებზე კონტროლის ხელში ჩასაგდებად.

ამასთან, გამოცემა აღნიშნავს, რომ აშშ-ის პრეზიდენტს ჯერ არ მიუღია საბოლოო გადაწყვეტილება იმის შესახებ, თუ როგორ იმოქმედოს ან ღირს თუ არა ამის გაკეთება საერთოდ.

ოფიციალური პირების თქმით, ტრამს არ სურს იმ ოპერაციების დამტკიცება, რომლებმაც შეიძლება საფრთხე შეუქმნას ამერიკელ ჯარისკაცებს ან მარცხი გამოიწვიოს.

თუმცა, მისი მრჩევლების უმეტესობა ერთ-ერთ ყველაზე აგრესიულ ვარიანტს ემხრობა: მადუროს ხელისუფლებიდან ჩამოშორებას.

გამოცემის ცნობით, აშშ-ის პრეზიდენტის თანაშემწეებმა უკვე მიმართეს იუსტიციის დეპარტამენტს დამატებითი რეკომენდაციების წარდგენის თხოვნით, რომლებიც შეიძლება ნებისმიერი სამხედრო ქმედების იურიდიულ საფუძვლად იქცეს.

ეს რეკომენდაციები შეიძლება მოიცავდეს სამართლებრივ საფუძვლებს მადუროს წინააღმდეგ სამხედრო ძალის გამოყენებისთვის კონგრესის ნებართვისა და ომის გამოცხადების გარეშე.

როგორც გამოცემა აღნიშნავს, ტრამპი, სავარაუდოდ, დაელოდება ამ თვის შუა რიცხვებში აშშ-ის საზღვაო ძალების უდიდესი და უახლესი ავიამზიდის, Gerald R-ის კარიბის ზღვის აუზში ჩასვლას.

მასზე დაახლოებით 5000 მეზღვაურია და 75-ზე მეტი მოიერიშე, სათვალთვალო და მხარდამჭერი თვითმფრინავი, მათ შორის F/A-18 ტიპის გამანადგურებლები.

გავრცელებული ინფორმაციით, კარიბის ზღვის აუზში დაახლოებით 10 000 ამერიკელი ჯარისკაცი იმყოფება, რომელთაგან დაახლოებით ნახევარი სამხედრო გემებზეა, დანარჩენი კი პუერტო რიკოში არსებულ ბაზებზე.

გარდა ამისა, ბოლო კვირების განმავლობაში, პენტაგონმა ვენესუელის სანაპიროებთან მისიების შესასრულებლად ლუიზიანასა და ტეხასის ბაზებიდან B-52 და B-1 ტიპის ბომბდამშენები გაგზავნა.

არმიის ელიტურმა 160-ე სპეციალური ოპერაციების პოლკმა, რომელმაც ავღანეთში, ერაყსა და სირიაში ვერტმფრენების გამოყენებით ფართომასშტაბიანი ანტიტერორისტული ოპერაციები ჩაატარა, ცოტა ხნის წინ ვენესუელის სანაპიროსთან წვრთნები გამართა.

ამასთან, ვარაუდობენ, რომ აშშ-ს მიერ ძალის ასეთი სწრაფი გაზრდა მადუროზე ფსიქოლოგიური ზეწოლის კამპანიის ნაწილია.