„საქართველოს საკანონმდებლო მაცნეს“ თავმჯდომარე გიორგი პატარიძე ოფიციალური ბეჭდვითი ორგანოების ფორუმის მუშაობაში მონაწილეობს, რომელიც პარიზში იმართება. ღონისძიებაზე ევროპის 35 ქვეყნის 70-ზე მეტი ოფიციალური ბეჭდვითი ორგანოს წარმომადგენლები ოფიციალური გამოცემების მუშაობის სპეციფიკაზე მსჯელობენ, გამოცდილებას უზიარებენ ერთმანეთს და ურთიერთთანამშრომლობის საკითხებს განიხილავენ.
ფორუმის ფარგლებში ევროპული ოფიციალური ბეჭდვითი ორგანოს წარმომადგენლებმა სამომავლო განვითარების პერსპექტივებზე ისაუბრეს. სამუშაო შეხვედრებზე დიდი ყურადღება დაუთმეს ელექტრონულ პროგრამას, რომელიც საშუალებას იძლევა, თავი მოუყაროს, ერთი მხრივ, ევროპის ქვეყნების სამართლებრივ აქტებს, მეორე მხრივ კი, ევროპის სასამართლოების გადაწყვეტილებებს. პროგრამა დაინტერესებულ პირებს დოკუმენტაციის მოძიებაში დაეხმარება, გაზრდის მართლმსაჯულების სფეროში მიღებულ გადაწყვეტილებებზე წვდომას და უფრო მოქნილს გახდის ოფიციალური ბეჭდვითი ორგანოების ელექტრონული ვერსიების სერვისებს. ასეთი პროგრამის გამართულად და ეფექტიანად მუშაობისათვის კი აუცილებელია ევროპული ოფიციალური ბეჭდვითი ორგანიზაციების ერთობლივი და კოორდინირებული მუშაობა.
