,,ნაციონალური მოძრაობა" პარლამენტში პრემიერ-მინისტრის მისვლას და მთავრობის ანგარიშის წარდგენას მოითხოვს. ოპოზიციონერი დეპუტატია მიხეილ მაჭავარიანის განცხადებით, ქვეყანაში პოლიტიკურად და ეკონომიკურად ისეთი მდგომარეობაა, რომ მთავრობა და საპარლამენტო უმრავლესობა თავად უნდა იყოს დაინტერესებული მოვიდეს პარლამენტში და მოსახლეობას ძალიან გასაგებად აუხსნას, როგორ აპირებს ქვეყნის ამ მძიმე მდგომარეობიდან გამოყვანას.
მისი თქმით, ანგარიში პარლამენტში იმ მიზნით არ შედის, რომ "ის დეპუტატებმა თხა და გიგოსავით დაიკავონ ხელში".
,,როდესაც ექსპორტი შემცირდა, როდესაც ლარი ყოველდღიურად უფასურდება, როდესაც უმეშევრობა იზრდება და ეკონომოკური პრობლემების პიკია, მთავრობამ უნდა ისაუბროს, თუ რას აპირებს, მაგრამ სამწუხაროდ, ისინი ამით არ არიან დაინტერესებულნი, რადგან უნიათო და არაკომპეტენტურ მთავრობას არაფერი აქვს სათქმელი", - აცხადებს მაჭავარიანი.
მთავრობის საპარლამენტო მდივანმა შალვა თადუმაძემ დღეს ჟურნალისტენს განუცხადა, რომ პრემიერ-მინისტრს პარლამენტში მისვლას არც კანონმდებლობა და არც პარლამენტის რეგლამენტი არ ავალდებულებს. საქართველოს პრემიერ-მინისტრი ირაკლი ღარიბაშვილი მთავრობის ანგარიშზე სასაუბროდ პარლამენტში მისვლას არ გეგმავს.
