საქართველო ბედნიერია, რომ ღვთისმშობელმა გადააფარა თავისი კალთა და იცავს ხილული და უხილავი მტრებისაგან, - განაცხადა სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ სიონის ღვთისმშობლის მიძინების სახელობის ტაძარში მარიამობის დღესასწაულთან დაკავშირებით წირვის დროს.
„ყველას გილოცავთ, თქვენ და სრულიად საქართველოს ამ დიდებულ დღესასწაულს, მიძინებას ყოვლადწმინდისა ღვთისმშობლისა. ყოვლადწმინდა ღვთისმშობელი არის მფარველი მთელი მსოფლიოსი - ცისა და ქვეყანისა, მაგრამ საქართველო განსაკუთრებული წილხვედრია ყოვლადწმინდისა ღვთისმშობლისა. სულ რომ არაფერი არ ყოფილიყო და მარტო ეს ფაქტი ყოფილიყო - რომ საქართველო ღვთისმშობლის წილხვედრია, ეს საკმარისი იქნებოდა საქართველოს გაბრწყინებისათვის. საქართველო ბედნიერია, რომ ღვთისმშობელმა გადააფარა თავისი კალთა. გადააფარა და იცავს ხილული და უხილავი მტრებისაგან“, - ბრძანა პატრიარქმა.
დღესვე, სიონის საპატრიარქო ტაძარში სნეულთათვის ყოვლადწმინდა ღვთისმშობლის პარაკლისი შესრულდება. ღვთისმსახურება 19:30 საათზე დაიწყება და მას სრულიად საქართველოს კათოლოკოს-პატრიარქი ილია მეორე აღასრულებს.
ამის შესახებ უწმინდესმა დღეს მარიამობის დღესასწაულთან დაკავშირებით გამართული სადღესასწაულო წირვის დასრულების შემდეგ განაცხადა. მისივე თქმით, მრევლი სნეული და უძლურებაში მყოფი ადამიანების ჯანმრთელობისთვის ილოცებს.
