რუსთავი 2-ის არხის ხელმძღვანელებმა დღეს კომპანიის გარშემო მიმდინარე პროცესები პოლიტიკური პარტიების წარმომადგენლებს გააცნეს, - ნათქვამია რუსთავი 2-ის ვებგვერდზე გამოქვეყნებულ ინფორმაციაში.
შეხვედრის დასრულების შემდეგ არხის გენერალურმა დირექტორმა განაცხადა, რომ ხელისუფლებას არ აინტერესებს რა ხდება და აპრიორი აკეთებს განაცხადს, რომ ეს არ არის პოლიტიზირებული სარჩელი
"იყო ყველა პოლიტიკური პარტია საპარლამენტოც და არასაპარლამენტოც, გარდა სამი პარტიისა. როგორც ჩანს, ხელისუფლებას არ აინტერესებს რა ხდება და აპრიორი აკეთებს განაცხადს, რომ ეს არ არის პოლიტიზირებული სარჩელი. ჩვენ შევეცდებოდით, რომ გვეჩვენებინა ის დეტალები, რომლებიც მათთვისაც საინტერესო იქნებოდა. არ იყო ასევე ნინო ბურჯანაძის და ირმა ინაშვილის პარტია. როგორც ჩანს, რუსთავი 2-ის საქმე აღმოჩნდა წყალგამყოფი მომავალი საარჩევნო მიზნებისთვის და სავსებით გასაგებია 2016 წლის პოლიტიკური ლანდშაფტი როგორი იქნება. ერთ მხარეს იქნება ისინი, ვინც არ იყვნენ დღეს ხელისუფლებასთან ერთად და მეორე მხარეს იქნება ყველა დანარჩენი, ვინც აქ იმყოფებოდა.
შეხევდრას არხის იურისტებიც ესწრებოდნენ.
ადვოკატის განმარტებით საუბარი შეეხებოდა როგორც სარჩელის უსაფუძვლობას, ასევე იმ ხარვეზებს, რომელიც ახასიათებს განჩინებას.
"მიღებული უზრუნველყოფის ღონისძიებები რეალურად კონსტიტუციით გარანტირებული ძირითადი უფლებების გათვალიწინების გარეშე აწესებს ძალიან მნიშვნელოვან შეზღუდვენს რუსთავი 2-ზე, რასაც საბოლოოდ მივყავართ იქითკენ, რომ რუსთავი 2-ის საქმიანობის პარალიზება მოხდეს," - განმარტა დიმიტრი ძაგნიძემ.
პოლიტიკოსებთან შეხვედრისას სარჩელთან დაკავშირებით ხანდაზმულობის საკითხზე ისაუბრა არხის იურისტმაც.
"ქიბარ ხალვაში დაობს მისი წილები იძულებით წართმევაზე. სამართლებრივი დეტალი აქ არის ხანდაზმულობის მომენტი. საქართველოს კანონმდებლობის თანახმად, იძულებით დათმობასთან დაკავშირებით არის ერთწლიანი ხანდაზმულობის ვადა, რომელიც გასულია უკვე. შესაბამისად სასამართლოს წარმოებაშიც არ უნდა მიეღო ეს საქმე," - განაცხადა თამთა მურადაშვილმა.
