ფანასკერტელის 12ა-ში მცხოვრებლები კორპუსის გვერდით მშენებლობას აპროტესტებენ და მერიას მიმართავენ გადახედოს მშენებლობაზე გაცემულ ნებართვას.
აღნიშნულ მისამართზე მცხოვრები ბესიკ სილიკაშვილი განმარტავს, რომ მშენებლობის პროექტის თანახმად, მათი აივნებისა და ფანჯრების წინ, 5 მეტრის მანძილზე აიგება ყრუ კედელი, რითაც საშიშროება ემუქრება ფანასკერტელის 12-ში მცხოვრები მოსახლეობის ჯანმრთელობას.
,,ფანჯრებიდან 5 მეტრის მანძილზე, ჩვენი კორპუსის გვერდით არის სტადიონი და საბავშვო მოედანი. ეს კორპუსი ახალი აშენებულია და საბავშვო მოედანი მშენებლობისას გამოიყენეს მშენებლობის მიზნით. დასრულების შემდეგ კი არავის უფიქრია მისი აღდგენა. ჩვენდა სამწუხაროდ აღმოჩნდნენ ადამიანები, რომელთაც არ ადარდებთ არც ბავშვები, არც სხვათა ცხოვრება და მხოლოდ ფული როგორ იშოვონ, ამაზე ფიქრობენ მთელი სიხარბით. ჩემთვის ახლახან გახდა ცნობილი, რომ შეპირებული მილიონი ხის ნაცვლად, 2014 წელს, თბილისის მერიამ გასცა თანხმობა ამ ადგილზე, ჩვენი კორპუსის კედლიდან 7 მეტრის მანძილზე მრავალსართულიანი კორპუსის აშენების შესახებ.
შესაბამისად:
1) აღარ იარსებებს საბავშვო მოედანი და რამოდენიმე ხე, რომელიც ამ მოედანზეა განლაგებული, მოიჭრება და არ გვექნება საშუალება ბავშვები ჩავიყვანოთ სახლთან მოედანზე;
2) 7 მეტრი კედლიდან ნიშნავს, რომ აივნის მოაჯირიდან დაახლოებით 5 მეტრში იქნება კედელი. ჩვენს სახლს, რომ იმ მხარეს ჰქონდეს ასევე ყრუ კედელი გასაგებია, მაგრამ არის აივნები და ფანჯრები და ეს არის ჩვენი ბინების ბუნებრივი განათების და მზის სხივების მიღების ერთადერთი საშუალება. კორპუსის აშენების შემთხვევაში აღარც ჰაერი გვექნება და აღარც მზე. კორპუსი მთლიანად დააკავებს ჰაერის ნაკადების მოძრაობას ან მაქსიმალურად შეამცირებს მათ, რაც გამოიწვევს მუდმივად მაღალი ტემპერატურის ქვეშ ცხოვრებას. ამასთანავე, შეგვეზღუდება ბუნებრივი განათება და შუქი ნაცვლად 6 საათისა, (ზამთარში) უნდა ავანთოთ დაახლოებით 3 საათზე. თავისთავად ეს გამოიწვევს მეტი ელექტროენერგიის დახარჯვას და მეტი თანხის გადახდას.
გარდა ზემო აღნიშნულისა, გასათვალისწინებელია ის ფაქტიც, რომ მზის სხივები სასიცოცხლოდ საჭიროა ადამიანის ჯანმრთელობისათვის. მისი შეზღუდვა და არასაკმარისი რაოდენობით მიღება პირდაპირ აისახება ჯანმრთელობის გაუარესებაზე. არ გვაქვს უფლება საკუთარ აივანზე მივიღო მზის საჭირო რაოდენობა? ან ბავშვებს აივნიდან ვადევნო თვალ–ყური?
3) მშენებლობის პროცესშიც გაუსაძლისი პირობები იქნება. მტვერი და ხმაური, რომელიც პირდაპირ შემოვა ბინაში ან ყველაფერი უნდა დავხუროთ. ასევე, მშენებლობის პროცესში ფარდებიც უნდა გადავწიოთ და დარაბებიც დავაყენოთ, რადგან ერთი გამოხედვა და ყველაფერი ჩანს ბინაში. მთელი დღე უცხო ადამიანების მეთვალყურეობის ქვეშ უნდა ვიყოთ?
4) მიუხედავად იმისა, რომ პროექტით ერთი შეხედვით ყველაფერი ნორმალურადაა, ეს მხოლოდ ქაღალდზე ჩანს და იმთავითვე აშკარაა, რომ კორპუსის მშენებლობა ზიანს მიაყენებს ჩვენს კორპუსს და შესაძლებელია საძირკვლის დაზიანება;
5) მშენებლობისას ან მშენებლობის დასრულების შემდგომ, კორპუსის ჩამონგრევისას ის მთლიანად დაეცემა და გამოიწვევს ჩვენი საცხოვრებელი კორპუსის ნგრევასაც, რაც უდიდეს მსხვერპლს და ზიანს მოიტანს;
6) წყალ-გაზ და ელექტრო გაყვანილობა გათვლილია მაცხოვრებელთა არსებულ რაოდენობაზე და რამდენად გაატარებს ასეთი რაოდენობით დამატებას, ეს კიდევ გასარკვევია;
7) ნაკვეთი არის 816კვ.მ. მესაკუთრემ შეიძინა აუქციონზე და საბუთის თანახმად, განსაკუთრებული პირობა იყო, რომ გამწვანება უნდა ყოფილიყო 30% ანუ 244,8 კვ.მ. არაერთხელ შეამცირეს ეს ციფრი (რატომ, როცა განსაკუთრებული პირობა იყო ეს?) და დღევანდელი საპროექტო მონაცემების თანახმად, გამწვანება შეადგენს 98კვ.მ.–ს.
მოვითხოვთ, გაუქმდეს ამ ნაკვეთზე მშენებლობის ნებართვა და აღდგეს საბავშვო გასართობი მოედანი თავისი გამწვანებით, იმ დასარგავი მილონი ხიდან რამდენიმე აქაც დაირგოს”, - აცხადებს სილიკაშვლი და დასძენს, რომ წინააღმდეგ შემთხვევაში მიმართავენ ადამიანის უფლებათა დამცველ ორგანიზაციებს.