„იმედის კვირის“ ჟურნალისტმა ბელა ზაქაიძემ „მიქაუტაძის საქმის“ მოწმეების საუბრის ფარული ჩანაწერები მოიპოვა. მამუკა მიქაუტაძის თვითმკვლელობასთან დაკავშირებით ჩატარებულ ჟურნალისტური გამოძიების მასალაში ნათქვამია, რომ, გელა მანჯავიძის თქმით, პოლიციაში მამუკა მიქაუტაძეს მის წინააღმდეგ ცრუ ჩვენება გამოსძალეს, რის გამოც მიქაუტაძემ თავი მოიკლა.
ამონარიდი ჟურნალისტური გამოძიებიდან:
„გელა მანჯავიძე პირდაპირ ამბობს, რომ 2013 წლის 5 ივლისს შეშელიძის ქუჩაზე მდებარე სატვირთო მანქანების სადგომზე ამავე ავტოსადგომის ხელოსანთან მამუკა მიქაუტაძესთან ერთად უკანონოდ დააკავეს, მარიხუანა კი შემთხვევის ადგილზე ცენტრალური კრიმინალური დეპარტამენტის თანამშრომლებმა მიიტანეს. ადასტურებს, რომ პოლიციაში მიქაუტაძეს მის წინააღმდეგ ცრუ ჩვენება გამოსძალეს, რის გამოც მიქაუტაძემ თავი მოიკლა. მოგვიანებით თავადაც იძულებული იყო პოლიციისათვის ცრუ ჩვენება მიეცა და მიქაუტაძესთან მარიხუანის მიტანა ეღიარებინა.
გელა მანჯავიძე: რა არის იცი... მე რომ ეგ არ მეთქვა, ის მთელი გრუპა უნდა დაეჭირათ.
ჟურნალისტი: რაზე?
გელა მანჯავიძე: პლანის ჩადებაზე.
ჟურნალისტი: ანუ ეს პლანი ჩადებული იყო?
გელა მანჯავიძე: ხო.
<...>
მანჯავიძემ ფარულ ჩანაწერში გვიყვება, რომ გამოძიებისთვის მიცემული მისი ჩვენება, რომელიც შინაგან საქმეთა სამინისტროს გენერალური ინსპექციის დასკვნაშიცაა მოყვანილი, სიმართლეს არ შეესაბამება და იძულებით არის მიცემული.
<...>
მუქაუტაძის თანამშრომლები თამაზ ხერგელია, გიორგი ბიძინაშვილი და გიორგი ბაქრაძე პირველები იყვნენ, რომლებსაც პოლიციაში ცემის და ჩვენების გამოძალვის შესახებ უამბო. ფარულ ჩანაწერში თამაზ ხერგელიამ დაადასტურა, რომ მიქაუტაძემ მას პოლიციაში ზეწოლის შესახებ მოუყვა.
თამაზ ხერგელია: დედა მომიტ...სო, სულ იდაყვითა მცემესო... ხო, დამაწერინესო.
<...>
მანჯავიძის თქმით, მიქაუტაძე მარიხუანას მართლაც მოიხმარდა და ორი თვით ადრე ფაქტზე პოლიციას დაჭერილიც ჰყავდა. მანჯავიძის ინფორმაციით სატვირთო ავტომანქანების მძღოლები პოლიციაში ჩაშვებულები იყვნენ და სამართალდამცავები მიქაუტაძეს ზეწოლის გზით თანამშრომლების წინააღმდეგ ფაქტების შეგროვებას აიძულებდნენ.
<...>
მიქაუტაძის საქმის ერთერთი მთავარი მოწმე გიორგი ბაქრაძე, რომელსაც 2 სატვირთო ავტომანქანა ჰყავდა, 3 კვირის წინ ვაჟა ფშაველაზე ავტოფარეხში დამარხული აღმოაჩინეს. გელა მანჯავიძის თქმით, გიორგი ბაქრაძე ის ადამიანი იყო, რომლის ჩაშვებასაც პოლიციელები მიქაუტაძეს აიძუკებდნენ.
გელა მანჯავიძე: თუ ბაქრაძის მკვლელობა არ გაიხსნა... ეს რასაც იძახის, თუ ამან ჩვენება არ შეცვალა, ჩათვალე საქმე მიქაუტაძეს უკავშირდება.
გელა მანჯავიძის ინფორმაციით, ბაქრაძის მკვლელობაში ბრალდებულმა ბაქრაძე საეჭვოდ გაიცნო. მას 6 იარაღი ოფიციალურად აქვს გაფორმებული, რაც ბევრ შეკითხვას ბადებს.
გელა მანჯავიძე: ძველი მილიციის ის იყო რა... აგენტი.
დაახლოებით ერთ თვეში შსს გენერალურმა ინსპექციამ დადო დასკვნა, რომლის მიხედვითაც მიქაუტაძეს გარდაცვალებაში პოლიციელების ბრალეულობა გამორიცხა.“
