შს მინისტრის ვახტანგ გომელაურის განცხადებით, ყვარელში პოლიციის მიერ დაკავებულ 32 წლის ოთარ სეფაშვილს, სამედიცინო დასკვნის მიხედვით, სხეულზე დაზიანებები არ აღენიშნება.
მისივე თქმით, სეფაშვილის ძმას, რომელიც პოლიციის განყოფილებაში იმყოფებოდა, მსგავსი პრეტენზია არ გამოუთქვამს. როგორც მინისტრმა განმარტა, იმ შემთხვევაში, თუ ოჯახის წევრების მხრიდან, ოფიციალური საჩივარი დაფიქსირდება, აღნიშნულ ფაქტზე დაიწყება გამოძიება.
გომელაურის თქმით, მიუხედავად საჩივრის არარსებობისა, ის საკითხით მაინც დაინტერესდა და ინფორმაცია მოიძია, რომლის მიხედვითაც პოლიციის თანამშრომლებს უფლებამოსილება არ გადაუმეტებიათ.
შეგახსენებთ, რომ ყვარელში მცხოვრები 32 წლის ოთარ სეფაშვილის ოჯახის წევრები ყვარლის პოლიციის უფროსს, გიორგი ფარეშიშვილს და სხვა თანამშრომლებს ფიზიკურ ანგარიშსწორებაში ადანაშაულებენ.
