დამოუკიდებელი საექსპერტო ცენტრ „ვექტორის“ დირექტორი ალექსანდრე გეჯაძე მის მიმართ ზეწოლის ფორმებს აზუსტებს. როგორც ექსპერტმა „2030“–ის ეთერში განაცხადა, კონკრეტული პირები შეეცადნენ პროვოკაციული ქმედებებით „ვექტორის“ მიერ სერგო თეთრაძის გვამზე ჩატარებული ეგსგუმაციის დასკვნის დისკრედიტაცია მოეხდინათ.
„აქ საუბარია კომბინირებულ მიდგომაზე. რასთან გვქონდა საქმე: აქ იყო მცდელობა დამოუკიდებელი საექსპერტო ცენტრის და პირადად ჩემი დისკრედიტაციისა, რომელიც მიზნად ისახავდა ვითომ ე.წ. ალიანსის ფაქტს ჩემსა და პროკურატურას შორის თეთრაძის საქმესთან დაკავშირებით. დამოუკიდებელი საექსპერტო ცენტრის დასკვნამ (ექსგუმაციის პროცესს ვგულისხმობ) ნათელი მოფინა ბევრ გარემოებას. კითხვის ნიშნის ქვეშ დავაყენეთ თეთრაძის გულისმიერი სიკვდილის არსებობის ფაქტიც კი“, – განაცხადა ალექსანდრე გეჯაძემ.
სამედიცინო ექსპერტის თქმით, მას ტელეფონით დაუკავშირდა პიროვნება, რომელმაც წარმოიდგინა თავი როგორც პროკურატურის მაღალჩინოსანი სახელად კახა თალაძე, და სთხოვა მას თავისი სამედიცინო დასკვნის პოზოცია დაეცვა ერთ–ერთ შეხვედრაზე. ალექსანდრე გეჯაძის თქმით, სატელეფონო საუბარში უცნობმა პიროვნებამ ხაზი გაუსვა იმას, რომ ცენტრის ხელმძღვანელი ყოველთვის პროკურატურას გვერდში ედგა, და დაუნიშნა შეხვედრა, რომელზეც შემგომ არ გამოჩენილა. ამის შემდეგ ტელეფონს აღნიშნული პირები არ პასუხობდნენ.
ამ გარემოებებმა ალექსანდრე გეჯაძე დააეჭვა და მან პროკურატურას მიმართა.
„მერე მივედი პროკურატურაში. მერე გავიგე, თურმე ეს იყო ბინძური პროვოკაცია. მე ეს ინფორმაცია წერილობითი სახით მოვახსენე პროკურატურას და ის გაარკვევს სიმართლეს. მე მჯერა პროკურატურის, რომ ამ საქმეს ბოლობდე მიიყვანს“, – დასძინა გეჯაძემ.
