ვაზაგაშვილების ოჯახის ადვოკატის გაგი მოსიაშვილის განცხადებით, დღევანდელ პროცესზე ბრალდებულმა გია სოსანაშვილმა უარი თქვა, რომ მისი საქმე ნაფიცმა მსაჯულებმა განიხილონ.
ადვოკატის განცხადებით, დაცვის მხარე რომ არგუმენტირებული ყოფილიყო, არ იყო გამორიცხული, ნაფიცი მსაჯულები მოეთხოვა ბრალდებულს.
„სოსანაშვილს განემარტა სასამართლოს მხრიდან, ხომ არ სურდა მისი საქმე ნაფიც მსაჯულებს განეხილათ. მან უარი განაცხადა. დაცვის მხარე უფრო არგუმენტირებული რომ ყოფილიყო, თეორიულად არ არის გამორიცხული, ნაფიცი მსაჯულები მოეთხოვა. ვფიქრობ, სოსანაშვილის ბრალეულობა დადასტურდება“, - განაცხადა გაგი მოსიაშვილმა.
რაც შეეხება იური ვაზაგაშვილის მკვლელობის ძირითადი საქმის გამოძიებას, ადვოკატი აცხადებს, რომ საქმეზე გამოძიება ამ დრომდე მიმდინარეობს და ის იმედს გამოთქვამს, რომ ვაზაგაშვილის მკვლელობის საქმეზე მარტო სოსანაშვილის ბრალეულობა არ იქნება დადასტურებული.
დღევანდელ სასამართლო პროცესზე მოსამართლემ საქმე არსებით განსახილველად გადასცა. არსებითი განხილვა 13 ივლისს 12:00 საათზე ჩაინიშნა.
