მენაშენეთა ასოციაციის პრეზიდენტის ირაკლი როსტომაშვილის თქმით, მდინარე ვერე ყოველ წელს დიდდება და წყალდიდობის აცილების მიზნით ვაკე–საბურთალოს გზასთან დამბა უნდა გაკეთდეს. როგორც მან „არჩევანში“ განაცხადა, ვერეს ხეობაში „470 მეტრს დაბლა ნიშნულზე არაფერი არ უნდა იყოს“.
„ვაკე–საბურთალოს გზა გადის დაახლოებით ზღვის დონიდან 480 მეტრის ნიშნულზე. ჩემი პოზიციით, 470 მეტრს დაბლა ნიშნულზე არაფერი არ უნდა იყოს: არც საწარმო, არც საცხოვრებელი, არც ძაღლების თავშესაფარი. იმიტომ რომ კიდევ მოწვიმს და კიდევ გაიჭედება გვირაბი. სვანიძის ქუჩის მაცხოვრებლებს უნდა ვუყიდოთ შესაბამისი საცხოვრებლები. მათი დარჩენა იქ არ შეიძლება. გზა უნდა აღდგეს და უნდა გაკეთდეს დამბა. საჭიროების შემთხვევაში იქ შეიძლება დაგუბდეს 5 მლნ კუბური მეტრი წყალი. ყველამ ვიცით, რომ გაზაფხულზე არის უხვი ნალექი და მდინარე ვერე დიდდება. ეს ტერიტორია უნდა იყოს დაცლილი“, – განაცხადა არქიტექტორმა.
