ზაფხულის პერიოდში იმ პირთა რაოდენობა იზრდება, რომლებიც ,,აფხაზეთსა და საქართველოს შორის სახელმწიფო საზღვრის” გადაკვეთას ცენტრალური სასაზღვრო პუნქტის გვერდის ავლით, ან სათანადო საბუთის გარეშე ცდილობენ.
ამის შესახებ ოკუპირებულ აფხაზეთში დისლოცირებული რუსეთის უშიშროების ფედერალური სამსახურის სასაზღვრო ნაწილის პრეს-სამსახური აცხადებს.
განცხადებაში ნათქვამია, რომ ე. წ. სასაზღვრო-გამშვებ პუნქტზე, შესაბამისი დოკუმენტების არქონის გამო, მიმდინარე წლის დასაწყისიდან საზღვრის გადაკვეთაზე უარი 550 ადამიანს უთხრეს.
,,სახელმწიფო საზღვრის გადასაკვეთად საჭირო ნებართვის გაცემა აფხაზეთის რესპუბლიკის სახელმწიფო მაკონტროლებელი ორგანოების კომპეტენციაში შედის.” - აღნიშნულია ოკუპირებულ აფხაზეთში განთავსებული რუსეთის ФСБ-ს სასაზღვრო ნაწილის პრეს-ცენტრის მიერ გავრცლებულ დოკუმენტში.
შეგახსენებთ, რომ ოკუპირებული აფხაზეთის საგარეო საქმეთა მინისტრი ვიაჩესლავ ჩირიკბა, თავის მოადგილესთან ოლეგ არშბასთან და თანაშემწე - ლაშა აშუბასთან ერთად 12 ივნისს გალის რაიონში იმყოფებოდა.
აფხაზ ჩინოვნიკთა ვიზიტი ჟენევის დისკუსიების მორიგი რაუნდის მოსამზადებელი პერიოდის ფარგლებში გაიმართა.
ოკუპირებული აფხაზეთის ხელისუფლების წარმომადგენლები გალის რაიონის ადმინისტრაციის ხელმძღვანელს თემურ ნადარაიას და მის მოადგილეს, ვახტანგ მაანს შეხვდენენ.
შეხვედრაზე გალის რაიონში არსებული ეკონომიკური, ჯანდაცვისა და უშიშროების სკითხები განიხილეს. საუბარი ასევე, საზღვრის გადაკვეთის რეჟიმს შეეხო.
ოკუპირებული აფხაზეთის საგარეო უწყების წარმომადგენლები ენგურის ხიდზე მოწყობილ ე. წ. სასაზღვრო-გამშვებ პუნქტსაც ეწვივნენ და იქ განლაგებულ რუსეთის უშიშროების ფედერალური სამსახურის მესაზღვრეებს გაესაუბრნენ.
ვიზიტის დასასრულს შეხვედრის მონაწილეებმა გამოთქვეს აზრი, რომ ,,აფხაზეთის რესპუბლიკის ამ სასაზღვრო და მეტად მგრძნობიარე რეგიონში” ვითარება მდგრადი სტაბილურობით ხასიათდება, რაც გალის რაიონის ხელმძღვანელობისა და სამართალდამცავი ორგანოების ეფექტური მუშაობის შედეგია.
