თვითმმართველობის კოდექსში შესატან ცვლილებებს თბილისი მერი დავით ნარმანია გამოეხმაურა და აღნიშნა, რომ თბილისის მთავრობის მიერ ქონების პირდაპირი წესით განკარგვა დააჩქარებს საინვესტიციო პროექტების განხორიცელებას და მთავრობის საქმიანობასაც უფრო ეფექტურს გახდის.
„დღეს არ გვაქვს ჩვენ ქონების პირდაპირ გასხვისებასთან დაკავშირებული უფლებამოსილებები, და ამ თვალსაზრისით, თბილისის მერია არის შეზღუდული, რაც საინვესტიციო პროექტების განხორციელებაში ხელს გვიშლის”, - განაცხადა დავით ნარმანიამ ,,კურიერთან” საუბარში.
თბილისის მერის განმარტებით, ცვლილებათა პაკეტი მერიას ასევე საშუალებას მისცემს ცენტრალური ხელისუფლების ნებართვის გარეშე აიღოს სესხი.
შეგახსენებთ, რომ პარლამენტში თვითმმართველობის კოდექსში შესატანი ცვლილების განხილვა დღეიდან იწყება. ცვლილებების მიხედვით, თბილისის საკრებულო აღარ დაამტკიცებს საპრივატიზაციო ობიექტების ნუსხას და პრივატიზაციის გეგმას, შესაბამისად, მერიას ეკონომიკური საქმიანობის განხორციელება საკრებულოს თანხმობის გარეშე შეეძლება.
