ინტერპარტიული ჯგუფის წევრი მამუკა კაციტაძე ჰპირდება „ქართულ ოცნებას“, რომ პოლიტიკურ ბრძოლაში ქვებს არ გამოიყენებს. როგორც მან „2030“-ის ეთერში განაცხადა, პროტესტი მაჟორიტარული სისტემის წინააღმდეგ კანონის ფარგლებიდან არ გამოვა.
„არავინ არ აპირებს ტანზე ტანსაცმლის შემოხევას და ქვების სროლას. არის პოლიტიკური ბრძოლის მეთოდები. შეიძლება ზოგიერთმა არ იცოდეს ეს მეთოდები, იმიტომ რომ მთელი თავისი დღედამოსწრება სულ ხელისუფლებაში არის, განსაკუთრებით მაჟორიტარები“, - განაცხადა პოლიტიკოსმა.
ამასთანავე მამუკა კაციტაძემ პოლიტიკური ბრძოლის ერთერთი ხერხიც დაასახელა: „ნურავის ნუ გაუკვირდება, რომ დღეს არ შედგა საპარლამენტო კვორუმი“.
მაჟორიტარულ სისტემაზე საუბრისას პოლიტიკოსმა აღნიშნა, რომ „ამ სისტემით «მოქალაქეთა კავშირი» და სააკაშვილი ხმებს იპარავდა“.
“ჩემთვის მაჟორიტარული სისტემა ერთპალატიან პარლამენტში არის მიუღებელი”, - აღნიშნა კაციტაძემ და ხელისუფლებას „ფართო კონსენსუსის პროდუქტის“ შექმნა შესთავაზა.
