ბიძინა ივანიშვილის პოლიტიკაში მოსვლის შესახებ „ნაციონალური მოძრაობის“ ხელისუფლებას ინფორმაცია ჰქონდა. ამის შესახებ იუსტიციის ყოფილმა მინისტრმა ზურაბ ადეიშვილმა გადაცემა „არჩევანში“ განაცხადა.
მისი თქმით, ბიძინა ივანიშვილი ყოველთვის მონაწილეობდა ქართულ პოლიტიკაში და ყოველთვის ჰქონდა ახლო ურთიერთობა „ნაციონალური მოძრაობის“ ხელისუფლების წარმომადგენლებთან.
„მე მას პირადად არასოდეს არ შევხვედრილვარ. თუმცა, მას ჰქონდა ინტენსიური კავშირები სხვა წევრებთან“, - აცხადებს ზურაბ ადეიშვილი.
„ის იყო პოლიტიკაში, ის ცდილობდა ზეგავლენა მოეხდინა გარკვეულ პროცესებზე და პოლიტიკაც არის პროცესებზე ზეგავლენის მოხდენა. ის კი ამას აკეთებდა 2004-შიც, 2005-შიც, 2009-შიც, 2010-შიც და აქედან გამომდინარე, მისი პოლიტიკაში მოსვლის სურვილის შესახებ ცალსახად ცნობილი იყო ჩვენთვის“, - აცხადებს ზურაბ ადეიშვილი.
