იუსტიციის მინისტრის თეა წულუიანის თქმით, ნაფიც მსაჯულთა ინსტიტუტი საჭიროებს ძირეულ გარდაქმნას, მაგრამ „მისი სრულად გაუქმებაზე საუბარი ვერ იქნება“. როგორც მინისტრმა გადაცემა „2030“-ში განაცხადა, ამ ტიპის სასამართლო პროცესზე დაშვებული შეცდომების გასაჩივრების მექანიზმი უნდა არსებობდეს. გარდა ამისა, თეა წულუკიანმა აღნიშნა, რომ ეს ინსტიტუტი ვერ მოერგო ქართულ სამართლებრივ სისტემას.
„თუკი ვიმსჯელებთ იმ პრაქტიკით, რასაც ინსტიტუტს დღეს გააჩნია, ვერ ვიტყვით, რომ შეეთვისა ქართულ სამართლებრივ სისტემას, ძალიან რბილად რომ ვთქვათ. ამიტომ, მეც მგონია, რომ ის საჭიროებს ძირეულ გარდაქმნას. მისი სრულად გაუქმებაზე საუბარი ვერ იქნება, რადგან ნაფიცი მსაჯულების ინსტიტუტის გაუქმება, სხვა თუ არაფერი, საკონსტიტუციო ცვლილებებსაც საჭიროებს. მაგრამ ჩვენ შეგვიძლია შევქმნათ გარანტიები იმისა, რომ ნაფიცი მსაჯულები არა მხოლოდ იკრიბებოდნენ (და ხშირად ვერც იკრიბებიან ხოლმე), არამედ, თუკი მათ ხარვეზი ან შეცდომა დაუშვეს, არსებობდეს გასაჩივრების მექანიზმი პროფესიონალ მოსამართლესთან“, - განაცხადა იუსტიციის მინისტრმა.
