ერთიანი ჩინეთის სახალხო წარმომადგენელთა ყრილობის (პარლამენტის) მუდმივმოქმედი კომიტეტის თავმჯდომარის მოადგილის ჩენგ ჩანგჭის განცხადებით, ქართველები და ჩინელები ,,ახალი აბრეშუმის გზის“ მშენებლობის პროცესში უფრო აქტიურად ითანამშრომლებენ.
ჩენგ ჩანგჭი დღეს, დელეგაციასთან ერთად პარლამენტის თავმჯდომარეს, დავით უსუფაშვილს შეხვდა. მისი თქმით, ის საქართველოში ვიზიტით პირველად იმყოფება, სადაც ძალიან ნაყოფიერი და თბილი შეხვედრები მოუწყვეს.
„ჩვენ ,,ახალი აბრეშუმის გზის“ მშენებლობის პროცესში უფრო აქტიურად ვითანამშრომლებთ. საქართველოს ძალიან მნიშვნელოვანი გეოგრაფიული მდებარეობა აქვს, რადგანაც იგი ევრაზიის გასაყარზე მდებარეობს და ეს საქართველოს განსაკუთრებული უპირატესობაა. საქართველო ძალისხმევას არ იშურებს იმისთვის, რომ სატრასპორტო დამაკავშირებელი კვანძი და სავაჭრო-ლოჯისტიკური ცენტრი გახდეს. ჩვენს ქვეყნებს შორის თანამშრომლობის განსავითარებლად ძალიან დიდი პოტენციალი არსებობს. ჩინეთი ძლიერ ჩინურ კომპანიებს მხარს დაუჭერს, რომ საქართველოში ჩამოვიდნენ, რათა მათ საკუთარი წვლილი შეიტანონ საქართველოს ინფრასტრუქტურის, კომუნიკაციების, სოფლის მეურნეობის და ღვინით ვაჭრობის განვითარებაში და მხარი დაუჭირონ საქართველოს აღმშენებლობას. ჩვენი ქვეყნების პარლამენტებიც მომავალში უფრო მჭიდროდ ითანამშრომლებენ, რათა უკეთესი საფუძველი შექმნან ორმხრივი ურთიერთობების განსავითარებლად“, - განაცხადა ჩანგჭიმ.
