აღმასრულებელ ხელისუფლებაზე არაფორმალური ზეგავლენა მის დამოუკიდებლობას ამცირებს, ასევე, არასაკმარისად დამოუკიდებელია პარლამენტიც, რომ ეფექტიანი ზედამხედველობა გაუწიოს მთავრობის საქმიანობას. ამის შესახებ "საერთაშორისო გამჭვირვალობა – საქართველოს" მიერ წარმოდგენილ ანგარიშშია ნათქვამი, რომლის პრეზენტაცია სასტუმრო "ქორთიარდ მარიოტში" მიმდინარეობს.
საქართველოს ეროვნული ანტიკორუფციული სისტემის შეფასების ანგარიშში, არსებული პოლიტიკური სისტემის ერთ-ერთ სერიოზულ პრობლემად არაფორმალური მმართველობის ნიშნებია დასახელებული.
"2013 წლის ბოლოდან მოყოლებული თავი იჩინა შესაძლო არაფორმალური მმართველობის ნიშნებმა, რაც მილიარდერ ბიძინა ივანიშვილის მიერ მთავრობაზე გავლენის შენარჩუნებაში გამოიხატა. ბიძინა ივანიშვილი პრემიერ-მინისტრად 2012 წლის მიწურულს აირჩიეს, მაგრამ 2013 წლის ნოემბერში იგი ამ თანამდებობიდან გადადგა. გადადგომის მიუხედავად, როგორც ჩანს, ივანიშვილი კვლავაც მნიშვნელოვან როლს ასრულებს გადაწყვეტილების მიღების პროცესში, რაც პრობლემურია, რადგან ოფიციალური თანამდებობის არქონის პირობებში კანონით დადგენილი ანგარიშვალდებულების მექანიზმები ბიძინა ივანიშვილზე არ ვრცელდება", - ნათქვამია ანგარიშში.
