„თავისუფალი დემოკრატების“ ლიდერის ირაკლი ალასანიას თქმით, ბიძინა ივანიშვილი ირაკლი შოთაძეს პოლიტიკური დაკვეთა მისცა და ამის სანაცვლოდ გენპროკურორობას დაპირდა. როგორც ყოფილმა თავდაცვის მინისტრმა გადაცემა რეაქციაში განაცხადა, „ძალიან მალე დადგება დრო და ბიძინა ივანიშვილს მოუწევს კითხვებზე პასუხის გაცემა“ ე.წ. კაბელების საქმესთან დაკავშირებით.
„აღმოჩნდა ის, რასაც თავიდან ვიძახდით, რომ ეს ადამიანები [დაკავებული მოხელეები] იყვნენ აბსოლუტურად უდანაშაულოები და რომ პროკურატურა და კონკრეტულად ბატონი შოთაძე პირდაპირ ასრულებენ ბიძინა ივანიშვილის პოლიტიკურ დაკვეთას. და ისიც ვიცი, რომ ბიძინა ივანიშვილი მას მთავარ პროკურორობას დაპირდა ამ და სხვა საქმეების სწორედ მისაყვანად. ძალიან მალე დადგება დრო და ბიძინა ივანიშვილს მოუწევს კითხვებზე პასუხის გაცემა მორალური კუთხით.“, – განაცხადა ალასანიამ.
ამასთანავე თავისუფალი დემოკრატების ლიდერმა მოითხოვა, რომ დღის წესრიგში დადგეს მთავარი პროკურორის და მისი მოადგილის პასუხისმგებლობის საკითხი.
„როდესაც დასრულდება ეს საქმე, სწორედ ირაკლი შოთაძის და მისი ხელმძღვაბნელის პასუხისმგებლობის საკითხი დადგება და მე ამ საკითხს პოლიტიკურადაც დავაყენებ. იყო ნათელი საუბარი ჩემსა და პრემიერსა და ყოფილ პრემიერს შორის, რომ თუკი ბრალდება სასამართლოში არ დადასტურდებოდა, მაშინ ისინი დააყრევინებდნენ თავებს პროკურორებს. მთავარი პროკურორის და მისი მოადგილის თავები უნდა გაგორდეს, – აღნიშნა ალასანიამ და დაამატა: პოლიტიკური დამკვეთი უნდა გაირკვეს! პარლამენტში მოსმენები ჩატარდება.“
