ევროსაბჭოს საპარლამენტო ასამბლეაზე ცესკოს თავმჯდომარე თამარ ჟვანიამ დღეს პრეზენტაცია წარადგინა თემაზე - „საარჩევნო ადმინისტრაციების ფუნქციონირება - ნეიტრალურობა და მიუკერძოებლობა როგორც გამოწვევა“. მან ყურადღება გაამახვილა ფაქტორებზე, რომლებიც უზრუნველყოფს საარჩევნო ადმინისტრაციის მიუკერძოებლობას და ნეიტრალურობას, მათ შორის კანონმდებლობის სიცხადეზე, საკანონმდებლო და ფინანსური დამოუკიდებლობის გარანტიებსა და კარგი პრაქტიკის დანერგვის მნიშვნელობაზე.
თამარ ჟვანია ევროსაბჭოს საპარლამენტო ასამბლეაზე ცესკოს მდივანთან გიორგი ჯავახიშვილთან ერთად ოფიციალური მიწვევით იმყოფება; ორდღიან ღონისძიებაზე განხილვების მთავარი თემა ევროპის საბჭოს ქვეყნებში თავისუფალი არჩევნების უფლების განხორციელებაა.
გუშინ, 4 ივნისს გამართულ შეხვედრაზე ევროპის საბჭოს დემოკრატიული მმართველობის გენერალურმა დირექტორმა, კლაუდია ლუჩიანიმ თამარ ჟვანიას გაწეული საქმიანობისთვის და საქართველოს ცენტრალური საარჩევნო კომისიის მიმართ ნდობის ამაღლებისთვის მადლობა გადაუხადა.
კონფერენციას ორგანიზებას, ევროპის საბჭო ვენეციის კომისიასთან და საფრანგეთის ეროვნულ ასამბლეასთან თანამშრომლობით, ევროკავშირის ფინანსური მხარდაჭერით უწევს. შეხვედრა აღმოსავლეთ პარტნიორობის ქვეყნებისთვის ევროკავშირის და ევროპის საბჭოს ერთობლივი პროგრამული თანამშრომლობის ჩარჩო ხელშეკრულების ფარგლებში იმართება.
