თურქეთი, გაიანა, გვატემალა, პანამა, სენტ-კიტსი და ნევისი, ტოგო, ტონგა, ტრინიდადი და ტობაგო, სომალი, მალავი- ეს ის 10 ქვეყანაა, რომლებმაც წელს პირველად გაიზიარეს საქართველოს მხარდამჭერი რეზოლუცია, თუმცა რეზოლუციის წინააღმდეგები წელს პირველად იყვნენ ვენესუელა, ბურუნდი, ზიმბაბვე და მალდივები. გაეროს გენერალურმა ასამბლეამ "იძულებით გადაადგილებულ პირთა და ლტოლვილთა სტატუსის შესახებ" რეზოლუცია 75 ხმით მიიღო, რაც გასულ წელთან შედარებით ექვსი ხმით მეტია. საქართველოს საგარეო უწყების განმარტებით, პოზიტიური დინამიკა იმის დასტურია, რომ საერთაშორისო თანამეგობრობა სულ უფრო ნათლად აცნობიერებს საქართველოს ოკუპირებული რეგიონებიდან იძულებით გადაადგილებულ პირთა ფუნდამენტური უფლებების დაცვის მნიშვნელობას.
