საგარეო საქმეთა სამინისტროში საქართველო-ევროკავშირის ასოცირების კომიტეტის პირველი სხდომა ჩატარდა. მასზე საქართველო-ევროკავშირის ასოცირების შეთანხმების შესრულების, საარჩევნო გარემოს გაუმჯობესების, საკონსტიტუციო რეფორმის, კანონის უზენაესობის გაძლიერებისა და ადამიანის უფლებათა დაცვის საკითხები განიხილეს. სხდომაზე საქართველო-ევროკავშირის სავიზო დიალოგის ფარგლებში მიღწეულ პროგრესზეც გამახვილდა ყურადღება. ხაზი გაესვა საქართველოში უსაფრთხოების კუთხით არსებულ ვითარებას, მათ შორის, ბოლო დროს ოკუპირებული ტერიტორიებიდან გახშირებულ გატაცებებს.
