საქართველოს ექს–პრეზიდენტის მიხეილ სააკაშვილის თქმით, უნდა აღიწეროს ის ზარალი, რომელიც ბიძინა ივანიშვილმა საქართველოს მოსახლეობას მიაყენა. როგორც სააკაშვილმა გადაცემა "არჩევანში" განაცხადა, ყოფილი პრემიერი იქნება ერთადერთი ადამიანი, ვინც სოლიდარულად, თავისი ქონებით უნდა აგოს პასუხი ამ ზარალზე.
"ივანიშვილის ფულებს ამოვიღებთ, ზიმბავვეშიც რომც დამალოს, სინგაპურშიც, ამერიკაშიც და რუსეთშიც. უნდა აღიწეროს ის ზარალი, რომელიც მან მიაყენა საქართველოს“, – განაცხადა სააკაშვილმა.
ამასთანავე, ექს–პრეზიდენტმა აღნიშნა, რომ ივანიშვილი ქვეყანას არაფორმალურად მართავს და რომ ყოფილმა პრემიერმა არაერთი ღირებული ობიექტი ჩაიგდო ხელში. „მითვისებულ“ პრივატიზებულ ობიექტებს შორის სააკაშვილმა მადნეული დაასახელა, რომელიც, ექსპრეზიდენტის მტკიცებით, ახალი წლის წინა ღამით ჩუმად, „ისე, რომ ხალხს ვერაფერი გაეგო, უფასოდ მისცეს 200-300 მილიონიანი ქონება ინვესტორს“.
მიხეილ სააკაშვილმა საყდრისშიც ბიძინა ივანიშვილის ინტერესებზე გაამახვილა ყურადღება და ასევე „ბანკი ქართუ“–ს ბოლო პერიოდის დიდ მოგებაზეც ისაუბრა.
„ამას ჰქვია ქვეყნის პრივატიზაცია და უმოწყალოდ ძარცვა“, – დასძინა სააკაშვილმა.
